İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 118 Hüküm no: 65 Orijinal metin no: [8a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abram v. Yovakim’in manav gediği bedelinden kalan borcunu ödemesi gerektiği hususunda Apostol v. Kostandi’ye tenbihte bulunulması Manav gediği mâddesi, Ma‘rûz Manav tâifesinden Abram v. Yovakim zimmî meclis-i şer‘-i enverde tâife-i mersûmeden Apostol v. Kostandi zimmî muvâcehesinde İstanbul’da Çardakönü nâm mahâlde kâin ma‘lûmü’l-hudûd bir bâb manav dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla altmış sehmi âharın ve kırk sehmi benim ve yirmi sehmi mersûm Apostol zimmînin mülkümüz iken işbu târih-i i‘lâmdan sekiz gün mukaddem mersûm Apostol zimmî mâlik olduğu yirmi sehm hisse-i şâyi‘asını bana bin yüz elli guruş semen tesmiyesiyle bi’l-îcâb ve’l-kabûl bâtten ve sahîhan bey‘ ü temlik ve vech-i lâyıkı üzere teslîm edip semen-i mezkûrun yüz elli guruşunu dahi bâyi‘-i mersûma edâ edip ol-vechile gedik-i mezkûrun yirmi sehmi dahi mülk-i müşterâm olmuş idi. Lâkin ben ber-vech-i muharrer semen-i mezkûrun bâkīsi olan bin guruşu edâya iktidârım olmamağla yirmi sehm şâyi‘-i mezkûru iştirâya nâdim ve pişman olmamla mebî‘-i mezkûru geri alıp semen-i mezkûrdan makbûzu olan yüz elli guruşu istirdâd ederim deyü takrîr-i meşrûhu üzere tasaddî eylediği da‘vâsı müvecceh olmamağla kelâmına iltifât olunmayıp ikrâr ü i‘tirâfına binâen semen-i bâkī-i mezkûr bin guruşu bâyi‘-i mersûma edâ ve teslîmi iktizâ eylediği müdde‘î-i mersûma tefhîm olunduğu İstanbul Mahkemesi’nden bi’l-iltimâs huzûr-ı [âlîlerine i‘lâm olundu]. Fî 25 Ş sene 1222.