İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 118 Hüküm no: 66 Orijinal metin no: [8b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Yovan v. Anaştaş’ın oğlu Marangoz Yorgi’nin Bakkal Yani aleyhindeki bakkal gediği davasının zamanaşımı nedeniyle reddedilmesi Tatavla’da bakkāl gediği mâddesi Ma‘rûz İşbu tarihden yirmi iki sene mukaddem hâlik olan bakkāl Yovan v. Anaştaş zimmînin sulbî kebîr oğlu ve hasran vârisi Marangoz Yorgi zimmî meclis-i şer‘-i enverde zikri âtî bakkāl dükkânı gediğinin otuz sehm hisse-i şâyi‘asına vaz‘-ı yedi mütehakkık olup arzuhâl eden Bakkāl Yani v. Frankoli zimmî muvâcehesinde mahrûse-i Galata’da Tatavla nâm mahâlde kâin bir bâb bakkāl dükkânı gediği babam hâlik-i mersûmun sağlığında mülkü ve ba‘de helâkihî hasran bana mevrûs olmuş iken târih-i merkūmdan beri ben marangoz olmamla sefâin-i sultaniye ile taşra gidip gelip dükkân-ı merkūm derûnunda bakkāllık edenlere mülâkī olup lâkin gedik-i mezkûru huzûr-ı hâkimde da‘vâ mümkün iken bu müddetde bilâ-özr sükût ve terk-i da‘vâ etmiş idim. El-hâletü hâzihî tedâvül-i eyâdî ile otuz sehm şâyi‘ine işbu mersûm Yani zimmî mâlik olmağla suâl olunup keff-i yed ve bana teslîm etdirilmesi murâdımdır deyü eylediği da‘vâsından mersûm Yani zimmî istintâk olundukda otuz sehm-i şâyi‘-i mezkûra bâ-hüccet-i şirâen mâlik olmağla vaz‘-ı yedini ikrâr, lâkin müdde‘î-i mersûm ve babası mersûmun mülkü olduğunu inkâr etmekle müdde‘î-i mersûm on beş sene bilâ-özr sükût ve terk-i da‘vâ eylediğini mu‘terif iken on beş sene bilâ-özr sükût ve terk olunan mülk gedik da‘vâsının bilâ-emr-i âlî istimâ‘ı memnû‘âtdan olmağla istimâ‘ olunmadığı İstanbul Mahkemesi’nden huzûr-ı [âlîlerine i‘lâm olundu]. Fî 9 N sene 1222.