İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 130 Hüküm no: 81 Orijinal metin no: [10a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefazade Seyyid Hacı Hasan Ağa’nın Balkapanı Nazırı tayin olunması Balkapanı nâzırı nasbı Ma‘rûz Âsitâne-i sa‘âdet’de Balkapanı tüccârından Salih Ağa ve Mehmed Ağa ve Silistreli es-Seyyid İsmail Ağa ve Kâtib Mehmed Efendi ve es-Seyyid Feyzullah Ağa ve Küçük Ömer Ağa ve Kasab el-Hâc Mehmed Ağa ve Damadı el-Hâc Mustafa Ağa ve Tosyalı el-Hâc Hüseyin Ağa ve sâirleri meclis-i şer‘-i enverde kapan-ı mezkûr nâzırı el-Hâc Mehmed Emin Ağa hâzır olduğu hâlde yine tüccârdan Vefazâde es-Seyyid el-Hâc Hasan Ağa b. Ahmed mahzarında her biri takrîr-i kelâm edip hâzır-ı mezbûr el-Hâc Mehmed Emin Ağa bir müddetden beri kapan-ı mezkûrda nâzır olup kendüye fütûr hâsıl olmağla nezâret-i mezkûreden rızâsıyla keff-i yed edip yeri hâlî ve hizmet-i lâzımesi mu‘attal kalmağın yerine encümenimizden bir müstakīm kimesnenin kıbel-i şer‘den üzerimize nâzır nasb olunması lâzımeden olduğuna binâen cümlemizin muhtâr ve müntahabımız müstakīm ve kâr-güzâr ve mütedeyyin ve perhiz-kâr ve muhayyerimiz olan işbu mezbûr es-Seyyid el-Hâc Hasan Ağa üzerimize nâzır nasb ü ta‘yîn olunması murâdımızdır dediklerinde mezbûr es-Seyyid el-Hâc Hasan Ağa dahi kıbel-i şer‘den bi’l-iltimâs üzerlerine nâzır nasb ü ta‘yîn olundukda ol dahi nezâret-i mezkûreyi kabûl edip hilâf-ı şer‘-i şerîf ve mugāyir-i emr-i münîf kimesneyi rencîde vü remîde etmeyip ber-vefk-i matlûb hareket ederek hizmet-i lâzımesini kemâ-yenbagī edâya ta‘ahhüd ve iltizâm etmeğin nezâret-i mezkûre hâzır-ı mezbûr el-Hâc Mehmed Emin Ağa keff-i yedinden mezbûr es-Seyyid el-Hâc Hasan Ağa üzerine tevcîh ve yedine berât-ı şerîf-i âlî-şân inâyet ve ihsân buyurulmak bâbında istid‘â-yı inâyet eyledikleri İstanbul Mahkemesi’nden bi’l-iltimâs huzûr-ı [âlîlerine i‘lâm olundu]. Fî 4 Şevvâl sene 1222.