İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 130 Hüküm no: 82 Orijinal metin no: [10a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Erzurumlu Bedros’un tütüncü dükkânı gediğini Yovan v. Panayot’a satması ve gediğin Gedikpaşa’daki dükkâna nakledilmesi Irgadpazarı’nda tütüncü gediği Ma‘ruz, Hâmiş-i arzuhâlde mastûr derkenâr nâtık olduğu üzere Ma‘den Kalemi’nde mukayyed ve mu‘teber tütüncü gediklerinden olup İstanbul’da Irgadpazarı’nda Parmakkapı dâhilinde Koğacılar kurbünde köşe başında kâin Tütüncü Karabet zimmî dükkânı demekle ma‘rûf bir bâb tütüncü dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin tedâvül-i eyâdî ile el-yevm mâliki Erzurumlu Bedros v. Haçok zimmî meclis-i şer‘-i münîrde Tütüncü esnâfından Yovan v. Panayot zimmî muvâcehesinde ber-vech-i muharrer mâlik olduğum gedik ta‘bîr olunan âlât-ı lâzımeyi mersûm Yovan zimmîye yüz altmış guruş semen-i makbûza tarafeynden bi’l-îcâb ve’l-kabûl bâtten ve sahîhan bey‘ ve temlik eylediğimde ol dahi ber-vech-i muharrer iştirâ ve temellük ve tesellüm ve kabûl edip mebî‘-i mezkûrun tağrîr ve gabnine ve bi’l-cümle gedik husûsuna müte‘allika âmme-i de‘âvîden her birimiz âharın zimmetini kabûlü hâvî ibrâ ve iskāt ve fîmâ-ba‘d zikr olunan tütüncü gediğinde benim aslâ ve kat‘a alâka ve medhalim kalmayıp mersûm Yuvan zimmînin mülk-i müşterâsı olmuşdur deyü ba‘de’l-ikrâr ve’t-tasdîk mersûm Yovan zimmî dükkân-ı mezkûrun mülk sâhibine lüzûmu oldukda gedik-i merkūmu dahi dükkâna nakl olunmak esnâfımızın bâ-fermân-ı âlî şurût-ı mer‘iyemizden olmağla gedik-i mezkûru kurb ve civârı olan Gedikpaşa’da doğramacı dükkânı ittisâlinde berber dükkânı karşısında kâin bâ-temessük taht-ı icâremde olup kimesnenin gediği olmayan bir bâb dükkânıma nakl ve ber-vech-i muharrer kalemine kayd olunmak murâdımdır dedikde fi’l-hakīka bu makūle mukayyed ve mu‘teber olan gedikler hasbe’l-iktizâ kurb [ve] civârına nakli esnâf-ı merkūmenin bâ-fermân-ı âlî şurût-ı nizâm-ı mer‘iyelerinden olduğunu kethudâ ve yiğitbaşı ve sâir hâzırûn bi’l-meclis ma‘lûmü’l-esâmî esnâf meclis-i şer‘de haber vermeleriyle zikr olunan Koğacılar kurbünde köşebaşında kâin dükkânda Karabet zimmî isminde mu‘teber olan tütüncü gediği mârrü’z-zikr kurb [ve] civârında kâin mersûm Yovan zimmînin bâ-temessük taht-ı icâresinde olan dükkânına nakl ve mahâll-i evvelin kaydı kaleminden ref‘ ve terkīn birle bâyi‘-i merkūmun ber-vech-i meşrûh bey‘inden mahâll-i sânîde mu‘teber olmak üzere mersûm Yovan zimmî uhdesine kayd ve yedine sûret i‘tâsını istirhâm eylediği İstanbul mahkemesinden huzûr-ı [âlîlerine i‘lâm olundu]. Fî 11 N sene 1222.