İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 131 Hüküm no: 83 Orijinal metin no: [10a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ulayıcı esnafı yiğitbaşısı olan Mehmed Aziz’in esnaflıktan ihraç olunması Ulayıcı esnâfından ihrâç Ma‘rûz İstanbul’da ulayıcı esnâfının kethudâları İsmail Ağa ve esnâfından Ahmed ve Derviş Ali ve Sadullah ve Mehmed Emin ve Derviş Ahmed ve Mustafa ve Mehmed Ağa ve Şeyh Süleyman Efendi ve el-Hâc Sadık Ağa ve el-Hâc Mustafa Ağa ve Mehmed Ârif ve Mehmed Emin ve Derviş Mehmed Said ve Ahmed Ağa ve es-Seyyid Salih ve es-Seyyid Mustafa ve İsmail Ağa ve sâirleri meclis-i şer‘-i enverde esnâf-ı mezbûreden es-Seyyid Osman ve es-Seyyid Hasan ve Hüseyin ve Mehmed Emin ve Ahmed ve Sâlih ve Mehmed Ali ve Mehmed ve sâirleri muvâcehelerinde esnâfımızın yiğitbaşımız olan gāib ani’l-meclis Mehmed Aziz nâm kimesne müfsid ve muharrik ve nice harekât-ı nâ-bercâyı mürtekib olmağla işbu mezbûrûnu tahrîk ve ifsâd edip onlar dahi esnâfımızın hadîsü’s-sinlerinden olduklarından yiğitbaşı-yı gāib-i mezbûrun iğfâl ve ifsâdına mütâba‘at birle bizlere inkıyâd ve itâ‘at ve müddet-i vâfireden beri beynimizde mu‘teber olan şurût-ı kadîmimize ri‘âyet lâzıme-i hâllerinden iken mezbûrûn bu esnâda bizlere isâbet ve her şurût-ı mu‘teberemize muhâlefet etmeleriyle suâl olunup mezbûrûn kadîmî üzere ihtiyâr esnâfa itâ‘at ve şurûtumuza ri‘âyetleri ve yiğitbaşı-yı mezbûrun ifsâd ve mazarratından bir vechile emn ü rahatımız olmamağla esnâfımızdan ihrâc ve kâr-ı âhara sülûk murâdımızdır dediklerinde mezbûrûn cevâblarında fîmâ-ba‘d esnâflarının ihtiyârlarına vücûhla inkıyâd ve itâ‘at ve şurût-ı mu‘teberelerine kadîmî üzere ri‘âyete her biri bi’r-rızâ ta‘ahhüd etmeleriyle gāib-i mezbûr Mehmed Aziz esnâf-ı mezbûreden ihrâc olunup kat‘a umûr-ı esnâfa müdâhale ve ta‘arruz etdirilmemek iktizâ eylediğini İstanbul Mahkemesi’nden bi’l-iltimâs huzûr-ı [âlîlerine i‘lâm olundu]. Fî 7 Şevvâl sene 1222.