İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 132 Hüküm no: 84 Orijinal metin no: [10b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Amasyalı Hafız Feyzullah’a poliçe bedelinden olan borcunu ödemesi hususunda Mustafa Alemdar’a tenbih olunması 1000 guruş hüküm Ma‘rûz Hâlâ Anadolu’da Amasya kazâsında sâkin Hafız Feyzullah b. Abdullah tarafından vekâleti el-Hâc Mustafa b. Abdullah ve el-Hâc Ebûbekir b. Fethullah şehâdetleriyle sâbit olan el-Hâc İbrahim b. el-Hâc Ali meclis-i şer‘-i enverde Galata Yağkapanı tüccârından Mustafa Alemdar b. Mahmud mahzarında müvekkilim mezbûrun şerîki gāib ani’l-meclis Molla Mehmed bin iki yüz yirmi bir senesi Şa‘bâni’l-mu‘azzam’ının on beşinci günü İsmail kazâsında iken yedinde olan müvekkilim mezbûrun malından mezbûr Mustafa Alemdar’ın şerîki Küçük İbrahim nâm kimesneye bi-tarîki’l-poliçe bin guruş verip ol dahi poliçe temessükü vusûlünden on bir gün mürûrunda Galata’da şerîki işbu mezbûr Mustafa Alemdar’ı işbu hâzır bi’l-meclis el-Hâc Mustafa Reis’e edâ etmek üzere ahz ü kabz ve işbu bir kıt‘a poliçe tahvîli i‘tâ etdikden sonra mezbûr Mehmed poliçe temessükünü hâzır-ı mezbûra irsâl edip sene-i mezbûre Zilhiccesi’nin yirmi birinci günü poliçe temessükü hâzır-ı mezbûra vusûl buldukda ol dahi götürüp mezbûr Mustafa Alemdar’a irâe eyledikde mezbûr Mustafa Alemdar meblağ-ı mezkûr müvekkilim mezbûrun malı olarak kendüye poliçe olduğunu tasdîk ederek poliçeyi kabûl ve on bir gün mürûrunda edâ etmek üzere meblağ-ı mezkûr bin guruşa kefîl ve zâmin oldukdan sonra mezbûr Mustafa Alemdar meblağ-ı mezkûru va‘desi hulûlünde hâzır-ı mezbûra edâ etmemekle meblağ-ı mezkûr bin guruşu mezbûr Mustafa Alemdar’dan poliçeyi kabûl ve kefâletine binâen bi’l-vekâle hâlâ taleb ederim deyü ba‘de’d-da‘vâ ve’l-inkâr müdde‘î-i vekîl-i mezbûr ber-vech-i muharrer müdde‘âsını udûlden ve Kapan-ı mezkûr tüccârından Halil b. el-Hâc Veliyüddin ve Ömer Beşe b. el-Hâc Halil şehâdetleriyle bi’l-muvâcehe ber-nehc-i şer‘î isbât edip şâhidân-ı mezbûrânı tezkiye esnâsında mezbûr Mustafa Alemdar şehâdetlerinde bi’t-tav‘ ve’r-rızâ tasdîk etmeğin mûcebiyle meblağ-ı mezkûr bin guruşu müvekkil-i mezbûr için vekîl-i mezbûra edâ ve teslîme mezbûr Mustafa Alemdar’a tenbîh olunduğu İstanbul Mahkemesi’nden huzûr-ı [âlîlerine i‘lâm olundu]. Fî 7 Şevvâl sene 1222.