İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 133 Hüküm no: 85 Orijinal metin no: [10b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Sadık Efendi’nin Muytablar çarşısında Kebabcı Hanı’ndaki oda gediğini Anbarsun v. Ohan’a satması Kebâbçı Hanı’nda oda gediği, Ma‘rûz İstanbul’da Ayasofya-i kebîr Câmi‘-i şerîfi Evkāfı musakkafâtından olup mahmiye-i mezbûrede Mûytâblar sûkunda kâin Kebâbçı Hanı demekle ma‘rûf han kapısının sol tarafında vâki‘ bir bâb oda derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmeye bâ-sûret mâlik olan Mehmed Sadık Efendi b. Mehmed Emin nâm kimesne meclis-i şer‘-i münîrde sarrâf tâifesinden Anbarsun v. Ohan zimmî muvâcehesinde sâlifü’l-beyân Kebâbçı Hanı demekle arîf han kapısının sol tarafında vâki‘ bir bâb oda derûnunda mevcûda yedinde olan bir kıt‘a sûret mantûkunca Başmuhâsebe’de mukayyed beyne’l-hıref gedik ta‘bîr olunur yedimde malım ve mülküm olan âlât-ı lâzıme-i ma‘lûmemi tarafeynden bi’l-îcâb ve’l-kabûl bâtten ve sahîhan bin iki yüz yetmiş beş guruşa sarrâf-ı mersûm Anbarsun zimmîye bey‘ ve temlik ve teslîm eylediğimde ol dahi yedimden iştirâ ve temellük ve tesellüm ve kabz ve kabûl edip semeni olan meblağ-ı mezkûr bin iki yüz yetmiş beş guruşu müşteri-yi mersûm yedinden tamamen ve kâmilen ahz ü kabz eyledim. Fîmâ-ba‘d âlât-ı lâzıme-i muharrere-i mezkûre Sarrâf-ı mersûm Anbarsun zimmînin mülk-i müşterâsı olup benim kat‘a alâka ve medhalim kalmamağla mebî‘-i mezkûrun tağrîr ve gabnine ve bi’l-cümle gedik husûsuna müte‘allika da‘vâdan her birimiz âharın zimmetini kabûlü hâvî ibrâ ve iskāt eyledik dedikde sarrâf-ı mersûm dahi ba‘de’t-tasdîk zikr olunan oda gediğinin Başmuhâsebe’de bâyi‘-i merkūm Mehmed Sadık Efendi üzerine olan kaydı ref‘ ve terkīn birle kendi üzerine kayd ve yedine sûret i‘tâ olunmak bâbında istid‘â-yı inâyet eyledikleri İstanbul Mahkemesi’nden huzûr-ı [âlîlerine i‘lâm olundu]. Fî-gurreti Receb sene 1222.