İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 134 Hüküm no: 86 Orijinal metin no: [10b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm bt. Hacı Hasan’a olan borcunu ödemesi hususunda Nefise bt. Osman’a tenbih olunması 400 guruş hüküm Ma‘rûz Sâhibe-i arzuhâl mu‘arrefetü’z-zât Ümmügülsüm bt. el-Hâc Hasan nâm hatun meclis-i şer‘-i enverde derûn-ı arzuhâlde mezkûrü’l-ism kezâlik mu‘arrefetü’z-zât Nefise bt. Osman nâm hatun mahzarında bin iki yüz yirmi senesi Rebî‘ülevveli’nin onuncu günü târihiyle müverrah işbu yedimde olan bir kıt‘a deyn temessükü mantûkunca mezbûre Nefise Hatun zimmetinde karzdan alacağım olan yedi yüz guruşun zahr-ı temessük nâtık olduğu üzere ceste ceste üç yüz guruşunu ahz ve istifâ edip zimmetinde bâkī dört yüz guruş alacağım kalmağla hâlâ taleb ederim deyü ba‘de’d-da‘vâ ve’s-suâl mezbûre Nefise Hatun cevâbında bi-tamamihi ikrâr ü i‘tirâf edip lâkin kabzını mu‘terife olduğu üç yüz guruşdan mâ‘adâ ceste ceste yetmiş guruş dahi teslîm olmağla bâkī zimmetimde ancak üç yüz otuz guruş deynim kalmışdır deyü meblağ-ı bâkī-i mezkûrun yetmiş guruşu mukābelesinde eylediği teslîm da‘vâsını müdde‘iye-i mezbûre Ümmügülsüm Hatun münkire ve mezbûre Nefise Hatun ceste ceste yetmiş guruş teslîmini isbâtdan izhâr-ı acz ile istihlâf etmeğin mezbûre Ümmügülsüm hatun bi’l-muvâcehe gıbbe’t-tahlîfi’ş-şer‘î mûcebiyle yetmiş guruş da‘vâsıyla mezbûre Nefise Hatun’a bilâ-beyyine mu‘ârazadan ba‘de’l-men‘ ikrâr ü i‘tirâfıyla lâzım gelen meblağ-ı bâkī-i mezkûr dört yüz guruşu müdde‘iye-i mezbûre Ümmügülsüm Hatun’a edâ ve teslîme mezbûre Nefise Hatun’a tenbîh olunduğu huzûr-ı [âlîlerine i‘lâm olundu]. Fî 11 Şevvâl sene 1222.