İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 138 Hüküm no: 92 Orijinal metin no: [11a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Haffaf Hacı İbrahim’e olan borcunu vârislerine ödemesi hususunda Şekerci Mustafa Ağa’ya tenbihte bulunulması 700 guruş hüküm Ma‘rûz İstanbul’da Etpazarı kurbünde sâkin iken bundan akdem vefât eden Haffâf el-Hâc İbrahim Ağa b. Mehmed’in verâseti zevce-i metrûkesi Nefise bt. Ahmed ile sulbî kebîr oğulları İsmail ve el-Hâc Mehmed ve Süleyman Şâkir’e ba‘de’l-inhisâr verese-i mezbûreden zâtı mu‘arrefe zevce-i mezbûre Nefise ile Süleyman Şâkir’den her biri meclis-i şer‘-i enverde Laleli kurbünde Şekerci Mustafa Ağa b. Mehmed mahzarında bin iki yüz yirmi bir senesi Rebî‘ülevveli’nin gurresi târihiyle müverrah işbu bir kıt‘a deyn temessükü nâtık olduğu üzere mezbûr Mustafa Ağa mûrisimiz müteveffâ-yı mezbûrdan hayatında karz aldığı bin üç yüz guruş ve yine mûrisimiz mezbûrun malından ve yedinden iştirâ ve kabz eylediği bir aded hilâlî sâ‘at semeninden dahi yüz doksan beş guruş ki cem‘an bin dört yüz doksan beş guruşun zahr-ı temessük nâtık olduğu üzere beş yüz yetmiş sekiz guruşunu mûrisimiz mezbûr hayatında ahz ü istifâ edip bâkīsi olan dokuz yüz on yedi guruşu kable’l-ahz fevt ve meblağ-ı mezkûr bize mevrûs olmağla bi’l-asâle ve bi’l-vekâle hâlâ taleb ederiz deyü ba‘de’d-da‘vâ ve’s-suâl mezbûr Mustafa Ağa cevâbında ancak bin guruşu ikrâr, mâ‘adâyı inkâr etmekle müdde‘iyân-ı mezbûrân ber-vech-i muharrer müdde‘âlarına ikāme eylediği Hafız Mehmed Efendi b. İbrahim ancak bin üç yüz guruşa şehâdet edip ve es-Seyyid Salih b. es-Seyyid İbrahim meblağ-ı mecmû‘-ı mezkûra şehâdet edip şâhidân-ı mezbûrânın şehâdetleriyle sâbit olan bin üç yüz guruşdan ziyâde yüz doksan beş guruşa bir nefer şâhid-i âhar ikāmesi esnâsında beynleri ıslâh ve tevfîk olunmağla mezbûr Mustafa def‘a-i sâniyede verese-i mersûmûnun tasdîka vekîlleri Mehmed Ağa b. Abdullah mahzarında meblağ-ı mecmû‘-ı mezkûr bin dört yüz doksan beş guruş zimmetinde sahîhan deynim olup müteveffâ-yı mezbûrun kabzını mu‘terif oldukları beş yüz yetmiş sekiz guruşdan bâkī deynim olan dokuz yüz on yedi guruşun iki yüz on yedi guruşunu bu def‘a verese-i mezbûrûna edâ ve teslîm etmemle zimmetimde bâkī ancak yedi yüz guruş sahîhan deynim kalmışdır deyü tâyi‘an ve kat‘iyyen ikrâr ü i‘tirâfını vekîl-i mezbûr ba‘de’t-tasdîk meblağ-ı bâkī-i mezkûr yedi yüz guruşun verese-i mersûmûna bi’t-taleb edâsıyla mezbûr Mustafa Ağa ilzâm olunduğu İstanbul Mahkemesi’nden bi’l-iltimâs huzûr-ı âlîlerine i‘lâm olundu. Fî 13 Şevvâl sene 1222.