İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 139 Hüküm no: 93 Orijinal metin no: [11a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm bt. Hacı Ali’nin vakıf ekmekçi fırınını Bogos, Ohan, Toros, Papacan ve Haçador’a kiraya vermesi Nân-ı azîz fırını mâddesi Ma‘rûz Sâhibe-i arzuhâl zâtı mu‘arrefe Ümmügülsüm bt. el-Hâc Ali meclis-i şer‘-i enverde Üsküdar ekmekçilerinin nizâm ustaları Bogos v. Kiragos ve Ohan v. Kalof ve Toros v. Agob ve Papacan v. Avakim ve Haçador v. Abram zimmîler muvâcehelerinde medîne-i mezbûrede Şeyh Hüdâyî es-Seyyid Mahmud Efendi -kuddise sırruhu’l-azîz- hazretleri vakf-ı şerîfleri musakkafâtından bâ-temessük-i mütevellî bi’l-icâreteyn mutasarrıfe olduğum bir bâb nân-ı azîz fırınını mukaddemâ beher şehr yedişer guruş onar paraya îcâr eylediğim nizâm ustaları Haçok ve Kabril ve Sıler hâlikler olup el-yevm işbu mersûmûn nizâm ustası olmalarıyla fırın-ı mezkûr taht-ı icârelerinde olmuş olduğundan fırın-ı mezkûrun şehriye kirâsı olan yedişer guruş onar parayı mersûmûndan mutâlebe eylediğimde vermekde ta‘allül etmeleriyle suâl olunup bana mâh be-mâh bilâ-ta‘allül edâya tenbîh olunmak murâdımdır deyü eylediğim da‘vâm müvecceh olmayıp lâkin muslihûn tavassutuyla beynimiz ıslâh olunmağla ben mutasarrıfe olduğum fırın-ı mezkûr işbu târih-i i‘lâm-ı şehrî gurresinden beher şehr altışar guruşa işbu beş nefer mersûmûna bi’t-terâzî îcâr ve teslîm, onlar dahi ber-vech-i muharrer istîcâr ve kabûl edip mâh be-mâh altışar guruş kirâyı bilâ-ta‘allül bana edâ ve teslîme ta‘ahhüd eylediler deyü ba‘de’l-ikrâr ve’t-tasdîk bu vechile kat‘-ı nizâ‘ eyledikleri İstanbul Mahkemesi’nden huzûr-ı [âlîlerine i‘lâm olundu]. Fî 16 Şa‘bân sene 1222.