İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 141 Hüküm no: 95 Orijinal metin no: [11b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Serpohi bt. Minas’ın, kiracıları Balıkçı Simon, Kirosi ve Parsam’ın dükkânından çıkarmaması Balıkçı dükkânı gediği mâddesi Ma‘rûz Arzuhâl eden Serpohi bt. Minas Nasrâniye tarafından husûs-ı âtîde vekâleti şahsını ârifân Karabet v. Artin ve âhar Karabet v. Agob zimmîler şehâdetleriyle sâbit olan Köpeksiz? Keresteci Uğurlu v. Marat bi’l-ma‘iye rü’yete memûr nezâret-i hazret-i Sadrazamîde âsûde evkāf müfettişi müderrisîn-i kirâm-ı zevi’l-ihtirâmdan fazîletlü Derviş Mehmed Esad Beyefendi ile du‘âhânemizde ma‘kūd meclis-i şer‘-i enverde zikri âtî üç aded balıkçı dükkânında müstecir olup derûnlarında mevcûd gedik ta‘bîr olunur âlât-ı lâzıme-i ma‘lûmelerine mâlikler olan Balıkçı Simon v. Kostandi ve Kirosi v. Foti ve Parsam v. Seksaros zimmîler muvâcehelerinde nezâret-i hazret-i Sadrazamîde âsûde Kumkapı hâricinde Kürkçübaşı Mescidi Vakfı musakkafâtından yine Kumkapı hâricinde biri birine muttasıl üç kıt‘a taze balıkçı dükkânları bâ-temessük-i mütevellî müvekkilem mersûme Serpohi Nasrâniye’nin taht-ı tasarrufunda olup üç kıt‘a dükkânda mersûmûn beher şehr on yedişer guruş dokuzar para kirâ ile müşâhereten müstecir olmalarıyla dekâkin-i mezkûrenin müvekkilem mersûmeye lüzûmu olmağla gāyet-i şehirde fesh-i icâre birle tahliye ve teslîmleri murâdıdır deyü bi’l-vekâle ba‘de’d-da‘vâ ve’s-suâl mersûmûn cevâblarında işbu yedimizde olan fermân-ı âlî-şânda zikr ü beyân olunduğu üzere İstanbul’da Kumkapı hâricinde sekiz bâb ve mahâll-i sâirede dahi otuz yedi bâb ki cem‘an kırk beş bâb tâze balıkçı dükkânları kadîmü’l-eyyâmdan beri balıkhâneden hisse alıp ibâdullâha bey‘le ta‘ayyüş ve gerek Âsitâne-i aliyye’de mellâh teklifi ve gerek vilâyetler beynimizde tekâlifât-ı sâiremizden mâ‘adâ Tersâne-i âmire’ye müretteb olan amele ücretlerinden dekâkin-i mezkûreye tarh ve tahmîl olunan mâhiye maktû‘an onar guruş hisselerimizi kabza memûra edâ ve teslîm edip dükkânlarımız ziyâde ve noksân olmayarak derûnlarında mevcûd gedik âlâtları beynimizde mer‘î ve mu‘teber olarak mülklerimiz olup işbu müstecirleri olduğumuz üç bâb dükkân dahi emr-i âlîde mezkûr olan sekiz bâb dükkândan ma‘dûd olarak yüz seneden mütecâviz müddetden beri balıkçı dükkânı olup mülk sâhibleri kirâlarını mâh be-mâh bilâ-ta‘allül tamamen ahz ü kabz eyledikçe gerek bizim ve gerek eslâfımız gedik mâliklerinin bilâ-mûceb ihrâçlarına ta‘arruzları mesbûk değildir deyü mazmûnları min-külli’l-vücûh takrîr-i meşrûhlarına mutâbık balıkçılar kethudâsı ve bi’l-cümle esnâfı hâzırûn bi’l-meclis mazbûtü’l-esâmî kimesnelerin yedlerinde olup ibrâz eyledikleri fermân-ı celîlü’ş-şânın mazmûnunu ve mârrü’z-zikr üç aded dükkân fermân-ı âlîde mezkûr mahâll-i merkūmda kâin sekiz bâb dükkândan ma‘dûd olduğunu ve kirâ-yı kadîmleri olan beher şehr on yedi guruş dokuz parayı mâh be-mâh bilâ-ta‘allül ahz ü kabz olunduğunu vekîl-i mersûm ikrâr ü i‘tirâf etmekle müstecirûn-ı mersûmûn kirâ-yı kadîmlerini mâh be-mâh bilâ-ta‘allül edâda kusûrları yoğiken bilâ-mûceb ihrâçlarına ta‘arruz muhill-i nizâm ve sâire sirâyet ile umûr-ı mühimmenin ta‘tîline bâdî ve ihtilâl-i esnâfa bâ‘is olacağını esnâf-ı mersûmûn ihbâr etmeleriyle ber-mûceb-i emr-i âlî bilâ-mûceb ihrâçlarına ta‘arruz olunmamak iktizâ eylediği müdde‘î vekîl-i mersûma tefhîm olunduğunu müş‘ir fermân-ı âlîleri sudûrunu istirhâm eyledikleri İstanbul Mahkemesi’nden huzûr-ı [âlîlerine i‘lâm olundu]. Fî 12 Şevvâl sene 1222.