İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 142 Hüküm no: 96 Orijinal metin no: [11b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Ayşe’ye olan borcunu ödemesi hususunda Seyyid Hasan b. Ali’ye tenbihte bulunulması 1950 guruş hüküm Ma‘rûz İstanbul’da Çırçır kurbünde el-Hâc Hasan mahallesinde sâkine zâtı mu‘arrefe Şerife Âişe bt. eş-Şeyh Salih Efendi meclis-i şer‘-i enverde Eyüb’de Eski Yeni Hamamcısı es-Seyyid Hasan b. Ali mahzarında bin iki yüz yirmi iki senesi Cemâziyelevvel’inin yedinci günü târihiyle müverrah yedime verdiği işbu bir kıt‘a deyn temessükü mantûkunca cihet-i karzdan mezbûr es-Seyyid Hasan zimmetinde alacağım olan bin yedi yüz elli guruş deyni mukābelesinde hamam-ı mezkûrun gediği olan eşyâyı temessükde sûret-i rehinde tahrîr, lâkin yedime vaz‘ ve teslîm etmeyip ile’l-ân kendi isti‘mâl etmekle temessük-i mezkûr ile alacağım olan meblağ-ı mezkûr [12a] bin yedi yüz elli guruş ve sene-i mezbûre Şevvâli’nin onuncu günü târihiyle müverrah âhar işbu bir kıt‘a temessük mûcebince dahi kezâlik karzdan zimmetinde alacağım olan iki yüz guruş ki cem‘an bin dokuz yüz elli guruşu mezbûr es-Seyyid Hasan’dan hâlâ taleb ederim deyü ba‘de’d-da‘vâ ve’s-suâl mezbûr es-Seyyid Hasan cevâbında iki kıt‘a temessük ile cem‘an bin dokuz yüz elli guruş zimmetinde deyn-i sahîhi olduğunu ve sûret-i rehinde tahrîr olunan eşyâ dahi el-yevm yedinde olduğunu bi-tamamihi tâyi‘an ve kat‘iyyen ikrâr ü i‘tirâf etmeğin mûcebiyle meblağ-ı mecmû‘-ı mezkûr bin dokuz yüz elli guruşu müdde‘iye-i mezbûre Şerife Âişe Hatun’a bi’t-taleb edâ ve teslîme mezbûr es-Seyyid Hüseyin’e tenbîh olunduğu İstanbul Mahkemesi’nden bi’l-iltimâs huzûr-ı [âlîlerine i‘lâm olundu]. Fî 14 Şevvâl sene 1222.