İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 143 Hüküm no: 97 Orijinal metin no: [12a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mihal v. Toma’nın Arabgirli Melkon aleyhindeki eşya ve temessük anlaşmazlığı Havlu ve peştemâl mâddesi Ma‘rûz Bâ‘isü’l-i‘lâm Mihal v. Toma zimmî meclis-i şer‘-i enverde Arabgirli Melkon v. Anparsum zimmî muvâcehesinde mersûm Melkon zimmî bundan akdem Rumeli’de medîne-i Selanik’de mütemekkin şerîkim tüccârdan Tomteros zimmî ile mülâkāt edip şerîkim mersûm malından üç renk havlu ve peştemâlini İstanbul’a bana emâneten irsâl ve îsâl, ben dahi kabz edip lâkin mersûm Melkon zimmî eşyâ-yı mezkûreyi İstanbul’da eğer akçesini tedârik edebilir ise üç bin yüz altmış guruşa benden iştirâ ve kabz etmek üzere şerîkim mersûm yedine üç bin yüz altmış guruşu Selanik’de verdiği bir kıt‘a temessük dahi şerîkim mersûm tarafından eşyâ-yı mezkûr ile bana vâsıl olmağla temessük-i mezkûr mûcebince kavl eyledikleri üç bin yüz altmış guruşu bana verip eşyâ-yı mezbûreyi benden iştirâ eylesin deyüp mersûm Melkon zimmî dahi ber-vech-i muharrer üç bin yüz altmış guruş tedârik edebilir ise eşyâyı İstanbul’da mersûm Mihal’den iştirâ ve kabz etmek üzere temessük-i mezkûru i‘tâ eylediğini ikrâr ve tasdîk edip lâkin akçe tedârik edemediğimden iştirâ edemememle temessük-i mezkûru istirdâd ederim deyü mahâllinde bey‘ ü şirâ mün‘akid olmayıp eşyâ-yı mezkûre mersûm Mihal yedinde şerîki Tomteros zimmînin malı olmak üzere emânet olduğunu ve temessük-i mezkûrda muharrer meblağ-ı mezkûr semen-i mebî‘ olmayıp ol-vechile muvâza‘a olduğunu tarafeyn tasdîk etmeleriyle meblağ-ı mezbûru tedârik birle eşyâyı mersûm Mihal’den iştirâ husûsu tarafeynin rızâsına mütevakkıf olup temessük-i mezkûrun muvâza‘a olduğu tarafeynin tasâdukuyla tahakkuk etmekle mersûm Melkon zimmîye red ve teslîm etdirilmek iktizâ eylediği İstanbul Mahkemesi’nden bi’l-iltimâs huzûr-ı [âlîlerine i‘lâm olundu]. Fî 14 Şevvâl sene 1222.