İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 143 Hüküm no: 98 Orijinal metin no: [12a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abacı Esnafı Kethudası Osman’ın Kavukçular içinde satın almış olduğu dükkânı kavukçu esnafından birine satması Kavukçu dükkânı Ma‘ruz, Ashâb-ı arzuhâl Kavukçular Kethudâsı Mehmed Efendi b. el-Hâc İsmail ve esnâfından el-Hâc Ahmed Ağa ve Mehmed Said Ağa ve Mehmed Şâkir Ağa ve diğer Mehmed Said Ağa ve Mehmed Emin ve Abdi Odabaşı ve el-Hâc Mustafa ve Ahmed ve Osman ve İsmail ve Abdülhamid ve es-Seyyid Mehmed ve sâirleri meclis-i şer‘-i enverde derûn-ı arzuhâlde mezkûrü’l-ism Abacı esnâfının yiğitbaşısı Osman b. Ahmed nâm kimesne mahzarında mezbûr Osman Kavukçular içinde kâin bir aded kavukçu dükkânı gediği iştirâ edip dükkân-ı mezkûru Abacı dükkânı ittihâz etmek irâdesinde olup lâkin işbu yedimizde olan bir kıt‘a fermân-ı âlî-şânda zikr ü beyân olunduğu üzere Bezzâzistân kurbünde ve Küçük Karaman’da olan dükkânlarımız ziyâde ve noksân olmayıp Kavukçu dükkânlarımız aralarında âhar esnâfın dükkânı olmayıp cümlesi biri birine muttasıl olmağla içimizden biri mâlik olduğu dükkân gediğini âhara bey‘ murâd eyledikde yine esnâfımızdan tâlibine bey‘ eylemek iktizâ eder iken işbu mezbûr Osman’ın kavukçu dükkânı gediği iştirâsı mugāyir-i nizâm-ı kadîm olmağla suâl olunup iştirâ eylediği kavukçu dükkânı gediğini yine içimizden tâlibine bey‘ murâd eylemesi murâdımızdır deyü mazmûnu takrîrlerine mutâbık ibrâz eyledikleri fermân-ı âlî-şânın mazmûnunu mezbûr Halil ikrâr ü i‘tirâf eylediğinden başka arzuhâl ve derkenârda dahi şurût-ı nizâm-ı kadîmleri vech-i muharrer üzere olduğunu nâtık olmağla ber-mûceb-i emr-i âlî iştirâ eylediği kavukçu dükkânı gediğini yine kavukçu esnâfından tâlibine semen-i misliyle bey‘ ve teslîm eylemesi muktezâ-yı şurût-ı nizâm-ı mer‘iye-i kadîm olduğu mezbûr Osman’a tefhîm olunduğu İstanbul Mahkemesi’nden huzûr-ı [âlîlerine i‘lâm olundu]. Fî 13 Şevvâl sene 1222.