İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 145 Hüküm no: 100 Orijinal metin no: [12a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü dükkânı ve tütüncü gediği hisselerinin kiraya verilmesi Tütüncü dükkânı îcârı Ma‘rûz Ashâb-ı arzuhâl İsmail ve Mehmed ve Âişe ve Nefise evlâdi’l-hâc Mustafa’dan mezbûrân İsmail ve Mehmed asâleten ve mezbûre Âişe’nin vâlidesi ve tarafından vekîl-i mürseli zâtı mu‘arrefe Ümmügülsüm bt. Hüseyin vekâleten ve mezbûre Nefise’nin zevci ve tarafından vekîl-i mürseli el-Hâc Mehmed Emin Ağa b. el-Hâc Ahmed vekâleten bi’l-ma‘iye rü’yete memûr Haremeyn-i şerîfeyn müfettişi müderrisîn-i kirâm-ı zevi’l-ihtirâmdan fazîletlü el-Hâc Mehmed Fikri Efendi tarafından mürsel Kâtib Mehmed Efendi ile du‘âhânemizde akd olunan meclis-i şer‘-i enverde zikri âtî rub‘ hisse dükkâna bi’l-icâreteyn mutasarrıf olmağla vaz‘-ı yedi mütehakkık olan derûn-ı arzuhâlde mezkûrü’l-ism Tütüncü Ömer Ağa b. Mehmed mahzarında İstanbul’da Hasır İskelesi nâm mahâlde kâin Ayasofya Vakfı’ndan beher şehr altmışar akçe icâre-i müecceleli bir bâb kebîr tütüncü dükkânının üç rub‘ hissesine beher şehr kırk beş akçe icâre ile babamız intikālinden irbâ‘an dördümüzün bâ-temessük-i mütevellî bi’l-icâreteyn taht-ı tasarrufumuzda ve derûnunda mevcûde beyne’l-hıref gedik ta‘bîr olunur mu‘teber gedik âlât-ı lâzıme-i ma‘lûmesinin dahi nısf-ı şâyi‘i kezâlik irsen mülkümüz olup gedik-i mezkûrun nısf-ı şâyi‘-i âharı mezbûr Ömer Ağa’nın tasarrufunda ve dükkân-ı mezkûrun dahi rub‘ hisse-i şâyi‘ası beher şehr on beş akçe icâre-i müeccele ile bâ-temessük-i mütevellî bi’l-icâreteyn mezbûr Ömer Ağa’nın taht-ı tasarrufunda olmağla mezbûr Ömer Ağa müddet-i vâfireden beri dükkân-ı mezkûrda müstakıllen sâkin olmağla işbu târihden akd-i muhâyee birle bizler dahi hissemize iktizâ eden müddetde müstakıllen sâkin olmak murâdımızdır deyü mütevellî vekîli hâzır olduğu hâlde asâleten ve vekâleten eylediğimiz da‘vâmızı mezbûr Ömer bi-tamamihi ikrâr ve tasdîk, lâkin dükkân-ı mezkûrda külliyetli zimemâtım olmağla işbu târihden evvelâ muhâyee ben hisseme göre müstakıllen sâkin olurum deyüp evvel ve sânî husûsunda beynimizde münâza‘a peydâ olmağla kur‘a olunmak üzere iken beynimiz ıslâh ve tevfîk olunmağla biz ber-vech-i muharrer mutasarrıf olduğumuz üç rub‘ hisse-i mezkûre ile nısf gedik-i mezkûru hüsn-i rızâ ve tayyib-i ihtiyârımızla şehr-i âtî Zilka‘deti’ş-şerîfesi gurresinden mezbûr Ömer Ağa’ya beher şehr yirmişer guruşa cümlemiz îcâr ve teslîm, ol dahi ber-vech-i muharrer istîcâr ve kabûl edip mâh be-mâh yirmişer guruş kirâyı bize bilâ-ta‘allül tamamen edâ ve teslîme ta‘ahhüd eyledi deyü ba‘de’l-ikrâr ve’t-tasdîk bu vechile kat‘-ı münâza‘a eyledikleri İstanbul Mahkemesi’nden huzûr-ı [âlîlerine i‘lâm olundu]. Fî 17 Şevvâl sene 1222.