İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 148 Hüküm no: 102 Orijinal metin no: [12b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Oskohi bt. Aleksanderi’nin oğulları Aleksan ve Artin’e bilezik bedelinden olan borcu ödemesi hususunda İstefan v. Sahak’a tenbih olunması 450 guruş hüküm Ma‘rûz Mahrûse-i Galata’da Perşembe Pazarı’nda mütemekkine iken işbu târihden altı sene mukaddem hâlike olan Oskohi bt. Aleksanderi Nasrâniyenin verâseti zevc-i metrûku Kigork v. Artin zimmî ile sadrî kebîr oğulları Aleksan ve Artin’e münhasıra ba‘dehû zevc-i mersûm Kigork zimmî dahi hâlik olup verâseti sulbî kebîr oğulları mersûmân Aleksan ve Artin’e ba‘de’l-inhisâr arzuhâl eden mersûm Aleksan asâleten ve mersûm Artin zimmî tarafından husûs-ı âtîde vekâleti Gabril v. Ohannes ve Bedros v. Ohannes zimmîler şehâdetleriyle sâbit olan Avanes v. Kirkor zimmî vekâleten meclis-i şer‘-i enverde hâlike-i evvel-i mersûmenin kendüden mukaddem hâlike olan sadriye kebîre kızı Maryem bt. Kigork Nasrâniyenin sadriye sagīre kızı Takohi Nasrâniyenin babası ve velîsi ve vasîyy-i mansûbu Tütüncü İstefan v. Sahak zimmî muvâcehesinde anamız ve mûrisimiz hâlike-i evvel-i mersûme Oskohi Nasrâniye sağlığında helâkinden mukaddem Galata’da [13a] müsteciren mütemekkin olduğu menzilin mutasarrıfı gāib ani’l-meclis tüccârdan Osib zimmî yedinde malından sekiz yüz guruş kıymetli elmas başlı bir tek bileziğini emânet vaz‘ ve teslîm ve helâkden sonra oğullarım Aleksan ve Artin zimmîlere ver deyüp ba‘dehû hâlike oldukda işbu mersûm İstefan zimmî bilezik-i mezkûrun birtakrîb fuzûlî gāib-i mersûm Osib’den ahz ve istihlâk etmekle kıymet-i mezkûresini tazmînini taleb ederiz deyü ba‘de’d-da‘vâ ve’s-suâl mersûm İstefan zimmî ber-vech-i muharrer bilezik-i mezkûru ahzını ikrâr ü i‘tirâf lâkin vasîsi olduğum kızım sagīre-i mersûmenin anasının anası hâlike-i evvel-i mersûme Oskohi Nasrâniye bilezik-i mezkûru vasîsi olduğum sagīre-i mersûmeye hibe ve bana teslîm etmeyip helâkden sonra al deyü mersûm Osib zimmî yedine emânet vaz‘ ve teslîm etmiş olmağla, ben dahi helâkinden sonra bilezik-i mezkûru gāib-i mersûm Osib’den kabz edip ba‘dehû bilezik-i mezkûru bozdurup istihlâk etmiş idim ve kıymeti ancak dört yüz elli guruşdur deyüp ziyâde kıymetini inkâr etmekle müdde‘iyân-ı mersûmân ziyâde kıymet müdde‘âlarını isbâta ba‘de’l-havâle mersûm İstefan zimmînin bilezik-i mezkûru hâlike-i mersûme hîn-i helâkinde kendüsü bi’l-velâye ve bi’l-vesâye kabz etmiş olmadığını i‘tirâf etmekle hibe-i tamme olmadığını hibe husûsunda kelâmına iltifât olunmayıp ahz ve istihlâkını ve kıymeti dört yüz elli guruş olduğunu ikrâr ü i‘tirâfına binâen ikrârıyla lâzım gelen dört yüz elli guruşu bi-tarîki’d-damân müdde‘iyân-ı asıl ve vekîl-i mersûmâna edâ ve teslîme mersûm İstefan zimmîye tenbîh olunduğu İstanbul Mahkemesi’nden huzûr-ı [âlîlerine i‘lâm olundu] Fî 18 Şevvâl sene 1222.