İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 149 Hüküm no: 103 Orijinal metin no: [13a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Abdullah Ağa’nın Mercan Hanı’nda kiracıları olan Pabuççu Kirkor ve ortakları Agob ve Bedros Artin ile anlaşması Mercan Hanı’nda oda îcârı Ma‘rûz Derûn-ı arzuhâlde mezkûrü’l-ism el-Hâc Abdullah Ağa b. el-Hâc Hasan Efendi bi’l-ma‘iye rü’yete memûr Haremeyn-i şerîfeyn müfettişi müderrisîn-i kirâm-ı zevi’l-ihtirâmdan fazîletlü el-Hâc Mehmed Fikri Efendi tarafından mürsel Kâtib İbrahim Edhem Efendi ile akd olunan meclis-i şer‘-i enverde zikri âtî odalarda müstecirleri olan ashâb-ı arzuhâl Pabuççu Kirkor v. İstefan ve müştereki Agob v. Artin ve Bedros v. İstefan ve Artin v. Ohan zimmîler muvâcehelerinde Haremeyn-i muhteremeyn nezâretinde âsûde Mercan Ağa Vakfı musakkafâtından İstanbul’da Mercan Hanı’nın ulyâsında cânib-i yesârda kâin ahşabdan mebnî birbirlerine muttasıl üç bâb odada mersûmûn beher şehr üçer guruş kirâ ile müşâhereten müstecirlerim olup derûnlarında mevcûd beyne’l-hıref gedik ta‘bîr olunur âlât-ı lâzıme-i ma‘lûmeleri dahi yedlerinde bâ-hüccet mülkleri olmağla zikr olunan odaların bana lüzûmu olmağla târih-i i‘lâm-ı şehrî gāyetinden fesh-i icâre birle tahliye ve teslîmleri murâdımdır deyü ben bu esnâda mersûmûnun müsteciren mütemekkinler oldukları odalardan hurûclarına tasaddî eylediğimde onlar dahi gedikleri mülklerimiz olarak gerek bizler ve gerek eslâfımız seksen seneden beri ve müşâhereten müsteciren mütemekkinler olagelmişizdir deyü hurûcdan imtinâ‘ etmeleriyle beynimizde ba‘de vukū‘i’l-münâza‘a, el-hâletü hâzihî beynimiz ıslâh ve tevfîk olunmağla ben mutasarrıf olduğum odaları işbu Şevvâli’l-mükerrem gurresinden i‘tibâr ile beher odayı beher şehr birer guruş zamla mersûmûna dörder guruşa îcâr ve teslîm, onlar dahi ber-vech-i muharrer istîcâr ve kabûl edip mâh be-mâh kirâları olan dörder guruşu bilâ-ta‘allül bana tamamen edâ ve teslîm etmek üzere ta‘ahhüd, ben dahi mâdâm ki beher şehr kirâlarını bilâ-ta‘allül edâ eyledikçe bî-vech ihrâçlarına tasaddî etmemek üzere ta‘ahhüd ve bu vechile külliyen kat‘-ı münâza‘a ve ref‘-i muhâsama eyledik deyü ikrâr ve tasdîkleri tescîl ve İstanbul Mahkemesi’nden huzûr-ı [âlîlerine i‘lâm olundu]. Fî 18 Şevvâl sene 1222.