İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 151 Hüküm no: 105 Orijinal metin no: [13a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nişancı mahallesinde vakıf kasap dükkânı gediği kiracısı Kasap Süleyman’ın vefatı nedeniyle dükkân gediğinin Dimitri v. Yorgi’ye kiralanması Kumkapı’da kasab gediği Ma‘rûz Hudâvendigâr-ı esbak cennet-mekân firdevs-âşiyân Sultan Abdülhamid Han -aleyhi’r-rahmetü ve’l-gufrân- Evkāf-ı şerîfelerinden Yedikule hâricinde kâin ganem salhânelerinden altıncı salhâneye merbût İstanbul’da Kumkapı kurbünde Nişâncı mahallesinde manav ve tütüncü dükkânları beynlerinde kâin bir bâb Kasab dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmeye vakf-ı müşârün-ileyh mütevellîsi temessüküyle müstakıllen mutasarrıf olan Kasab Süleyman b. Ahmed bilâ-veled fevt olmağla gedik-i mezkûr mahlûl ve cânib-i vakfa âid ve râci‘ olduğu ihbâr olunmağla mârrü’z-zikr kasab dükkânı gediğini ber-vech-i âtî istîcâra tâlib kasab esnâfından işbu bâ‘isü’l-i‘lâm Dimitri v. Yorgi zimmî meclis-i şer‘-i münîrde vakf-ı müşârün-ileyhin kāimmakām-ı mütevellîsi kâtib-i hazret-i ağa-yı Dârü’s-sa‘âdeti’ş-şerîfe Mustafa Efendi hazretleri taraflarından mürsel vekîl-i müsecceli Câbî-i Vakıf Hüseyin Efendi b. Ahmed mahzarında Hâssa Kasabbaşı Ağa tarafından mürsel Kasablar Kethudâsı Süleyman Ağa ve sâir mazbûtü’l-esâmî kasab ustaları hâzır oldukları hâlde takrîr-i kelâm edip kāimmakām-ı mütevellî-i mûmâ-ileyh taraflarından vekîl-i müsecceli câbî-i merkūm Hüseyin Efendi zikr olunan kasab dükkânı gediğini müteveffâ-yı merkūmun mahlûlünden sûk-ı sultânîde ba‘de’l-muzâyede ve inkıtâ‘ı’r-rağbe el-yevm mu‘accele-i mümâsili olduğu bi’l-ihbâr mütehakkık olan iki bin dört yüz elli guruş mu‘accele ile taraf-ı vakf-ı müşârün-ileyhden kāimmakāmlığı hasebiyle bana îcâr ve teslîm etmeleriyle ben dahi ber-vech-i muharrer istîcâr ve tesellüm ve kabûl ve mu‘accele-i merkūm iki bin dört yüz elli guruşu taraf-ı vakıf için vekîl-i mezbûra teslîm ve umûr-ı vakf-ı müşârün-ileyhe sarfla istihlâke emir etmemle, ol dahi kabz ve umûr-ı vakfa sarfla ba‘de’l-istihlâk mu‘accele-i müstehleke-i merkūmenin adem-i istifâsına ve bi’l-cümle husûs-ı merkūma müte‘allika âmme-i de‘âvîden taraf-ı vakfı ve kāimmakām-ı mütevellî-i mûmâ-ileyh vekîl-i mezbûrun zimmetlerini kabûlü hâvî ibrâ ve iskāt eyledim dediğini kāimmakām-ı mütevellî-i vekîl-i mezbûr tasdîk etmeğin sâlifü’l-beyân Nişâncı mahallesinde kâin kasab dükkânı gediği müteveffâ-yı merkūm Süleyman’ın mahlûlünden mersûm Dimitri zimmîye îcâr olunduğunu müş‘ir zabt ve tasarrufu için taraf-ı vakf-ı müşârün-ileyhden temessük i‘tâ buyurulmak bâbında istid‘â eylediği İstanbul Mahkemesi’nden huzûr-ı [âlîlerine i‘lâm olundu]. Fî 10 Şevvâl sene 1222.