İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 152 Hüküm no: 106 Orijinal metin no: [13b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Balat İskelesi’nde hamal Mehmed Beşe’nin Artin v. Şehrata aleyhindeki alacak davasının kabul olunmadığı 100,5 guruş men‘ Ma‘rûz İstanbul’da Balat İskelesi’nde Hamal Mehmed Beşe b. Ahmed meclis-i şer‘-i enverde ekmekçi nizâm ustalarından Artin v. Şehrata zimmî muvâcehesinde karındaşı Manuk zimmî hâzır olduğu hâlde işbu târihden üç sene mukaddem ben Kapan-ı dakīk’de unculuk eder iken malımdan bin iki yüz yedi kıyye sekiz çuval dakīki beher kıyyesini narh-ı cârîsi olan yirmi üçer akçeden cem‘an iki yüz otuz bir guruş kırk bir akçeye mersûm Artin zimmîye bey‘ ve teslîm ve kabz-ı semen etmiş idim. Lâkin ben ol târihde dakīkin beher kıyyesini on birer paraya iştirâ etmiş olmamla beher kıyyesinde onar akçeden cem‘an yüz buçuk guruş hasarâtım olmağla mersûm Artin zimmî hasarâtım olan yüz buçuk guruşu dahi malından bana zâmin olsun deyü takrîr-i meşrûhu üzere tasaddî eylediği da‘vâsı müvecceh olmamağla kelâmına iltifât olunmayıp mersûm Artin zimmîye bî-vech mu‘ârazadan men‘ olunduğu İstanbul Mahkemesi’nden bi’l-iltimâs huzûr-ı [âlîlerine i‘lâm olundu]. Fî 27 Receb sene 1222.