İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 153 Hüküm no: 107 Orijinal metin no: [13b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Mehmed’in Büyükkaraman’da açmış olduğu dükkânda bıçak imaline bıçakçılar esnafının müdahale etmemesi Bıçakçı dükkânı nizâ‘ı Ma‘rûz İstanbul’da ağaç saplı bıçak i‘mâl eden esnâfın kethudâsı ashâb-ı arzuhâl es-Seyyid el-Hâc Mehmed ve esnâfından el-Hâc İsmail ve el-Hâc Abdullah ve es-Seyyid Ali Usta ve İbrahim Usta ve Yiğitbaşı Hüseyin Usta ve sâirleri meclis-i şer‘-i enverde bıçakçı esnâfından Ali b. Mehmed mahzarında Tütüncüler Kethudâsı İbrahim Ağa ve tütün kıyıcı tâifesinden mazbûtü’l-esâmî kimesneler hâzır oldukları hâlde işbu yedimizde olan bir kıt‘a sûret nâtık olduğu üzere İstanbul’da ve tevâbi‘inde envâ‘ bıçakcı dükkânı ancak elli iki adede mahsûs ve münhasır olup ziyâde ve noksân olmamak memnû‘ iken işbu mezbûr Ali, Sultan Mehmed’de Büyükkaraman nâm mahâlde bir dükkân ihdâs ve küşâd ve hâzırûn-ı mezbûrûna rahîs bahâ ile bıçak i‘mâl edip dükkânı elli iki adedden ziyâde olmakla ihdâs ve küşâd eylediği dükkânı sed olunup bizim ma‘rifetimizle ma‘dûd olan elli iki aded dükkândan birini istîcâr ve gediğini iştirâ eylemek üzere mezbûr Ali’ye cebr olunmak murâdımızdır deyü eyledikleri da‘vâları hilâf-ı şer‘-i şerîf olmağla mezbûr Ali’nin Büyükkaraman’da olan dükkânında bıçak i‘mâl ve rahîs bahâ ile bey‘e mümâna‘at ve müdâhale etdirilmemek iktizâ edip esnâf-ı mezbûre da‘vâ-yı mezkûreleriyle mezbûr Ali’ye bî-vech-i şer‘î mu‘ârazadan men‘ olundukları İstanbul Mahkemesi’nden huzûr-ı [âlîlerine i‘lâm olundu]. Fî 15 Şevvâl sene 1222. [Şühûdü’l-hâl:] Kethudâ İbrahim Ağa, Yiğitbaşı Seyyid Abdullah, Mehmed Odabaşı, Şehremînli Mustafa Efendi, Bandırmalı Seyyid Mustafa Ağa, Molla Ali Usta, Kıyıcı Hüseyin Usta, Halil Usta, Ali Usta, Abdurrahman Usta, Kıyıcı Ömer Usta, Hüseyin Usta, Küçük Ahmed, Kıyıcı Salih Usta, Osman Usta.