İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 154 Hüküm no: 108 Orijinal metin no: [13b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fransa tüccarından Yakoboviç v. Yakoboviç’in İmameci Hacı Ali’de olan alacağını taleb etmesi 17074 guruş hüküm Ma‘rûz France kralının büyük elçisi General Sebastiyan’ın işbu memhûr takrîrinde mastûr Fransa tâcirlerinden Yakoboviç v. Yakoboviç nâm müstemen tercümânı Panost hâzır olduğu hâlde İmâmeci el-Hâc Ali Ağa b. Ali muvâcehesinde bin iki yüz on sekiz senesi Cemâziyelâhire’si gurresi târihiyle müverrah işbu bir kıt‘a deyn temessükü mûcebince yedimden iştirâ ve kabz eylediği ma‘lûmü’l-mikdâr kehrübâ semeninden mezbûr el-Hâc Ali Ağa zimmetinde altı bin sekiz yüz seksen iki buçuk guruşdan bâkī bin altı yüz altmış iki buçuk guruş sene-i mezbûre Zilka‘desi’nin onuncu günü târihiyle müverrah işbu bir kıt‘a deyn temessükü mûcebince dahi kezâlik ma‘lûmü’l-mikdâr kehrübâ semeninden on dört bin beşyüz on beş guruşdan bâkī on üç bin beşyüz beş guruş ve bin iki yüz yirmi bir senesi Cemâziyelâhiri’nin dördüncü günü târihiyle müverrah işbu bir kıt‘a temessük mûcebince dahi kezâlik ma‘lûmü’l-mikdâr kehrübâ semeninden dahi iki bin yedi yüz on sekiz buçuk guruşdan bâkī bin sekiz yüz doksan altı buçuk guruş ki cem‘an cihet-i mezkûreden mezbûr el-Hâc Ali Ağa zimmetinden on yedi bin yetmiş dört guruş alacak hakkım olmağla hâlâ taleb ederim deyü ba‘de’d-da‘vâ ve’s-suâl mezbûr el-Hâc ali Ağa cevâbında bi-tamamihi ikrâr ü i‘tirâf, lâkin on dört bin beş yüz on beş guruşluk kehrübâ iştirâ ve kabz eylediğimde bana ri‘âyet edip bir mikdârını tenzîl ve mâ‘adâsını dahi edâya mehl vermeğe ta‘ahhüd etmiş olmağla suâl olunsun, bir mikdâr tenzîl ile bâkīsine mühlet vermesi matlûbumdur demesi rızâya mütevakkıf olmağla ikrâr ü i‘tirâfı mûcebince meblağ-ı mecmû‘-ı mezkûr on yedi bin yetmiş guruşu müdde‘î-i mersûma edâ ve teslîme mezbûr el-Hâc Ali Ağa’ya tenbîh olunduğu İstanbul Mahkemesi’nden huzûr-ı [âlîlerine i‘lâm olundu]. Fî 24 Şevvâl sene 1222.