İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 154 Hüküm no: 109 Orijinal metin no: [13b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nefise bt. Osman’ın, Saliha bt. Hüseyin aleyhindeki Tevekkel Hamamı’nın kira bedeli talebi Tevekkel Hamamı husûsî mazbata kaydı Ma‘rûz Zâtı mu‘arrefe Nefise bt. Osman meclis-i şer‘-i enverde kezâlik zâtı mu‘arrefe Saliha bt. Hüseyin mahzarında İstanbul’da Aksaray kurbünde Yusuf Paşa Çeşmesi’nde Tevekkel Hamamı demekle ma‘rûf taht-ı icâremde olup kezâlik dahi mülküm olmağla işbu bin iki yüz yirmi iki senesi Rebî‘ülâhiri gurresi günü beher şehr elli sekizer guruşa îcâr ve teslîm edip işbu Şevvâl gāyetine gelince yedi ayda müctemi‘ olan dört yüz elli guruşdan iktizâ eden mesârifine mahsûben rızâmla elli altı guruşunu tenzîl edip bâkīsi olan üç yüz elli guruşdan dahi yüz doksan buçuk guruş ahz ve istifâ edip zimmetinde bâkī kalan yüz elli dokuz buçuk guruşu hâlâ taleb ederim deyü ba‘de’d-da‘vâ ve’s-suâl mezbûre Saliha cevâbında ber-vech-i muharrer ikrâr ü i‘tirâf, lâkin tenzîl eylediği elli altı guruş ve kabzını mu‘terife olduğu yüz doksan buçuk guruşdan mâ‘adâ müdde‘iye-i mezbûre için hâzır bi’l-meclis Salih Ağa’ya elli dört buçuk guruş dahi teslîm olup ve işbu defter nâtık olduğu üzere hamam-ı mezkûrun iktizâ eden mesârifine bi-şarti’r-rücû‘ emriyle malımdan masrûfum olan iki yüz yirmi yedi guruş ki cem‘an iki yüz seksen buçuk guruş meblağ-ı bâkī-i mezkûr üç yüz elli guruşdan ba‘de’t-tenzîl zimmetimde yetmiş sekiz buçuk guruş deynim kalmışdır deyü eylediği teslîm ve masraf da‘vâsını müdde‘iye-i mezbûre münkire olmağla mezbûre Saliha şâhide havâle olunup bir dahi meclis-i şer‘a gelmemeleriyle henüz da‘vâlarına faysal verilmeyip bu vechile cerîdede mazbût olduğu imtisâlen li’l-emri’l-âlî sûret-i zabtı İstanbul Mahkemesi’nden huzûr-ı [âlîlerine i‘lâm olundu]. Fî 11 Şevvâl sene 1222.