İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 156 Hüküm no: 111 Orijinal metin no: [14a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Hatice’nin Camcı Ahmed Beşe aleyhindeki camcı dükkânı gediği davasından men olunması Camcı gediği nizâ‘ı Ma‘rûz Sâhibe-i arzuhâl mu‘arrefetü’z-zât Şerife Hadice bt. Mehmed Esad bi’l-ma‘iye rü’yete memûr evkāf müfettişi müderrisîn-i kirâm-ı zevi’l-ihtirâmdan fazîletlü Derviş Mehmed Esad Beyefendi ile Çarşamba günü Arz Odası’nda huzûr-ı hazret-i kāimmakām-ı âlî-makāmîde ma‘kūd meclis-i şer‘-i enverde zikri âtî bir bâb vakıf camcı dükkânında müşâhereten müsteciri olan derûn-ı arzuhâlde mezkûrü’l-ism Camcı Ahmed Beşe b. Mustafa mahzarında nezâret-i hazret-i Sadrazamîde âsûde Merzifonî Kara Mustafa Paşa Vakfı’nın mütevellîsi tarafından vekîl-i mürseli Câbî-i vakıf Osman Ağa hâzır olduğu hâlde vakf-ı mezbûr musakkafâtından İstanbul’da Gedikpaşa kurbünde Kaliçacı Hasan mahallesinde kâin ber-mûceb-i temessük-i mütevellî bi’l-icâreteyn taht-ı tasarrufumda olan bir bâb camcı dükkânı derûnunda mezbûr Ahmed beher şehr yedişer guruş kirâ ile müşâhereten müstecirim olmağla derûn-ı dükkânda mevcûd beyne’l-hıref gedik ta‘bîr olunur şirâen mülküm olan camcı gediği âlât-ı lâzıme-i ma‘lûmemi işbu târihden üç sene mukaddem mezbûr Ahmed’e yedi yüz guruş semen-i makbûza bey‘ ve temlik ve teslîm, ol dahi iştirâ ve tesellüm etmiş idi. Lâkin bu esnâda mezbûr Ahmed cânib-i vakıfdan gedik-i mezkûru istîcârını nâtık temessük ahz eylediği mesmû‘um olmağla ben ber-vech-i muharrer bey‘ime nâdim ve pişman olmamla semen-i mezkûru geri alıp gedik-i mezkûrdan keff-i yed ve bana geri teslîme tenbîh olunmak murâdımdır deyü takrîr-i meşrûhu üzere tasaddî eylediği da‘vâsında bâtten bey‘ ve teslîm ve kabz-ı semen eylediğini mu‘terif iken geri mülküne istirdâd da‘vâsı iltifâta şâyân olmadığından başka mukaddemâ bir def‘a dahi ber-vech-i muharrer kelâmına iltifât olunmadığını mezbûr Ahmed’in yedinde olup bin iki yüz yirmi senesi Zilka‘desi’nin yirmi dokuzuncu günü târihiyle müverrah ol târihde Rumeli kādıaskeri bulunan semâhatlü atûfetlü Mehmed Ârif Efendi hazretlerinin ve evkāf müfettişi Mehmed Seydâ Efendi’nin hâtemlerini hâvî ibrâz eylediği bir kıt‘a i‘lâm-ı şer‘î nâtık olmağın mezbûr Ahmed’e suâl dahi teveccüh etmeyip mezbûre Şerife Hadice da‘vâ-yı mezkûresiyle mezbûr Ahmed’e bî-vech mu‘ârazadan men‘ olunduğu İstanbul Mahkemesi’nden huzûr-ı [âlîlerine i‘lâm olundu]. Fî 23 Şevvâl sene 1222.