İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 157 Hüküm no: 112 Orijinal metin no: [14a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eflak ve Boğdan’dan koyun ve keçi gelene kadar İstanbul kasaplarının kesmiş oldukları hayvan derileri fiyatına zam yapılması Kasablar ile debbâğların cülûd mâddesi Ma‘rûz Hudâvendigâr-ı sâbık hazretlerinin evkāf-ı şerîfeleri kāimmakām-ı mütevellîsi hâlâ mehd-i ulyâ ve setr-i kübrâ Hazretlerinin kahvecibaşılığı hizmet-i celîlesiyle şeref-yâb olan Abdurrahman Efendi’nin kāimmakām-ı mütevellîsi olduğum Selîmiye Vakf-ı şerîfi müstecirlerinden Yedikule ve mahâll-i sâirede kâin debbâğân esnâfının kasab tâifesinden ahz ve mübâya‘a edegeldikleri cülûdun kadîm olan fiyâtına teshîlen li’l-maslaha bir mâh mikdârı beşer para zam olunması husûsunu emr ve irâde-i seniyyeleri debbâğân esnâfı nezd-i çâkerîye celb ve irâde-i aliyye kendülere tefhîm ve ifâde olundukda esnâf-ı mezbûre Tersâne-i âmire ve Cebehâne ve Tophâne ve Baruthâne-i ma‘mûrelere ve mahâll-i sâireye külliyetli mühimme veregeldiklerinden zamm-ı mezkûre bir vechile râzı olmadılar ise dahi ilhâh olunarak fiyât nizâ‘ına mebnî dağda tevkīf olunan cülûdu tamamen teslîm etmek ve bâ-fermân-ı âlî kırkım nizâmlarına ve kadîm olan kuzu ve keçi cülûdu fiyâtlarına halel gelmemek ve Mart duhûlünde yine fiyât-ı kadîmelerine ri‘âyet olunmak şartıyla mücerred emir ve irâde-i seniyyelerine imtisâlen bin iki yüz yirmi iki senesi Ramazan-ı şerîf ibtidâsından yirmi üç senesi Muharrem’inde duhûl edecek Mart ibtidâsına varınca zamm-ı mezkûru kabûl ve irzâ etdirildiği ma‘lûm-ı devletleri buyuruldukda husûs-ı mezbûr fazîletlü İstanbul kādısı ve Haremeyn-i şerîfeyn müfettişi efendi dâ‘îlerine havâle ile sa‘âdetlü Sekbânbaşı ve Kasabbaşı ağalar hâzır oldukları hâlde tarafeynin mukāvele ve ta‘ahhüdleri i‘lâm-ı şer‘îye rabt ve tefsîk olunmak için fermân-ı âlîleri sudûru iltimâsını hâvî Bâb-ı âlî’ye takdîm eylediği işbu bir kıt‘a takrîri bâlâsına İstanbul kādısı fazîletlü efendi ve Haremeyn Müfettişi Efendi işbu takrîre nazar ve izzetlü Sekbânbaşı Ağa ve Hâssa kasabbaşısı hâzır oldukları hâlde debbâğân ve kassâbân kethudâsı ve ihtiyârlarını huzûrunuza celb ve husûs-ı mezbûru bi’l-müzâkere karâr ve muktezâsını i‘lâm eyleyesiz deyü bu dâ‘îlerine ve Haremeyn müfettişi efendiye hitâben sâdır olan fermân-ı âlî-şâna imtisâlen izzetlü Sekbânbaşı Ağa ve Hâssa kasabbaşısı ağa hâzır oldukları hâlde bi’l-ma‘iye rü’yete memûr Haremeyn-i şerîfeyn müfettişi müderrisîn-i kirâm-ı zevi’l-ihtirâmdan fazîletlü el-Hâc Mehmed Fikri Efendi ile akd olunan meclis-i şer‘de Kasablar Kethudâsı Süleyman Ağa ve Hafız el-Hâc Mehmed Emin Ağa ve el-Hâc Osman Ağa ve es-Seyyid İbrahim ve Molla Hüseyin ve Eğrikapılı Salih Efendi ve Molla Osman ve Mehmed Emin ve Molla Mustafa ve sâir bi’l-cümle kasab esnâfı ile vakf-ı müşârün-ileyh müstecirlerinden Yedikule Debbâğânı Kethudâsı Mustafa Ağa ve esnâfından Süleyman Ağa ve el-Hâc Lütfullah Efendi ve Halil Ağa ve Ahmed Usta ve Yiğitbaşı Mustafa ve Mehmed Usta ve İsmail ve Mustafa ve el-Hâc Ali Usta ve Zekeriya Usta ve Üsküdar Debbâğânı Kethudâsı Ali Efendi ve Yiğitbaşı es-Seyyid Yakub ve Mehmed Ağa ve Mustafa ve Hafız Mustafa Efendi ve es-Seyyid Mustafa ve Tophâne Kethudâsı Mehmed usta ve sâir Kasımpaşa ve Eyüb bi-ecma‘ihim debbâğân esnâfı celb olunup husûs-ı mezbûrun bi’l-müzâkere tanzîmi esnâsında nizâ‘ ve mücâdeleleri imtidâdından sonra kuzu etrâf-ı İstanbul’da vâki‘ kurâ ve çiftlikâtdan hâsıl olur kabîlinden olmağla kuzu cülûduna kat‘a ta‘arruz olunmayarak debbâğ esnâfının yedlerinde olan evâmir-i aliyye ve hutût-ı hümâyûnlarda münderic şurût-ı nizâm-ı kadîm-i mer‘iyelerine aslâ halel tatarruk etmeyip vaktiyle bi-tamamihi yine ri‘âyet olunmak üzere işbu sene-i mübâreke Ramazani’l-mübâreki gurresinden i‘tibâr ile bi-inâyetillâhi te‘âlâ Eflâk ve Boğdan câniblerinden ağnâm tevârüdü zuhûruna kadar debbâğân esnâfı kasab tâifesinden mübâya‘a edecekleri bi’l-cümle ağnâm ve keçi derilerinin fermân-ı âlî-şânlarında musarrah fiyât-ı mukarreresi üzerlerine rızâlarıyla beşer para zamla iştirâya ve kassâbân esnâfı dahi zebhlerinden hâsıl olan bi’l-cümle ağnâm ve keçi cülûdunu ber-vech-i muharrer fiyât-ı mukarereresine beşer para zamla Eflâk ve Boğdan ağnâmı tevârüdü zuhûruna değin debbâğân esnâfına bey‘e ve yedlerinde müctemi‘ olan cülûdu dahi teslîme ve Eflâk ve Boğdan câniblerinden ağnâm tevârüdü zuhûrunda celebân tâifesinden sakatı her kaç paraya kat‘-ı fî olunur ise dahi debbâğân esnâfının yedlerinde olan evâmir-i aliyye ve hutût-ı hümâyûnda münderic şurût ve kuyûda yine kemâ-fi’s-sâbık itâ‘at ve ri‘âyete tarafeyn bi’r-rızâ ahd [ü] mîsâk ve kabûl ve ittifâk etmeleriyle tarafeynin işbu ahd-i kavî ile râbıta-bend olduğu düstûrü’l-amel tutulup hilâfına hareket vukū‘a gelmemek bâbında bâlâsı tuğrâ-yı garrâ-yı hazret-i cihân-dârî ile müzeyyen bir kıt‘a fermân-ı âlî-şân sudûru niyâzıyla istirhâm eyledikleri imtisâlen li’l-emri’l-âlî İstanbul Mahkemesi’nden huzûr-ı [âlîlerine i‘lâm olundu]. Fî 24 Şevvâl sene 1222.