İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 159 Hüküm no: 113 Orijinal metin no: [14a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’a gelen kâğıdın kâğıdçıbaşı vasıtasıyla esnafa dağıtılmasına dair emir Kâğıdçıların nizâ‘ı Ma‘rûz Sâdır olan fermân-ı âlî-şâna imtisâlen Âsitâne-i aliyye’de vâki‘ ashâb-ı arzuhâl kâğıdçı esnâfının kethudâları ve bi’l-cümle esnâfdan ma‘lûmü’l-esâmî kimesnelerin yedlerinde olan âhar arzuhâlleri hâmişinde mastûr derkenârlara ve işbu arzuhâle nazar olundukda kadîmü’l-eyyâmdan beri mutlakā taşradan Âsitâne-i sa‘âdete tevârüd eden ecnâs kâğıd ve abâdî ve Flemenk resm-i gümrüğü edâ birle der-mahzen olundukdan sonra içimizden bir ahad varıp hufyeten kâğıd iştirâ etmeyip kâğıdçıbaşı ve yiğitbaşı ve ihtiyârları ile bi’l-ittifâk tüccârına varılıp [14b] lede’l-mu‘âyene râyic-i vakt üzere bi’r-rızâ bahâları kat‘ olunup umûr-ı mühimme için lüzûmu mikdârını Kâğıdçıbaşı iştirâ ve mâ‘adâsını ibâdullâha bey‘ için kâğıdçı esnâfı iştirâ ve iktizâ eden bahâsı ashâbına tamamen def‘ ü teslîm olunageldiğine binâen bi’l-cümle tevârüd eden kâğıdlar telef ve zâyi‘ olmayıp gerek cânib-i mîrîye ve gerek ibâdullâha kâğıdlar vaktinde gerek kâğıdcıbaşı ve gerek esnâfında dâimâ mevcûd ve mahfûz kâğıd bulunduğundan cânib-i mîrî ve ibâdullâh kâğıd husûsunda muzâyaka ve ıztırâbdan vücûhla masûn ve memûn olagelmiş iken ba‘zı muhtekir ve tuhafçı makūlesi zimmîler tevârüd eden ecnâs kâğıdı hufyeten tüccârından iştirâ ve mahzenlerinde ketm ve ihtikâr ile kumaşçı ve yemenici tâifesine ve sâir bu makūle isrâfât kabîlinden bî-lüzûm mahallere gālî bahâ ile füruhta ictisârlarından katı vâfir battal ve telhîsi itlâf ve izâ‘asına bâ‘is ve bu takrîb ile umûr-ı mühimme ve ta‘yînât-ı mîrî için iktizâ eden kâğıd vaktiyle verilemeyip ve bahâsı dahi dâimen ve müstemirren tezâyüd ve hadd-i i‘tidâli tecâvüz ile ibâdullâh dahi dûçâr-ı meşakkat ve ıztırâb ve giriftâr-ı hüsrân oldukları bedîhiyâtdan olduğundan başka ecnâs kâğıd inhisâr-ı bey‘ ü şirânın memnû‘iyyetini hâvî şeref-efzâ-yı sudûr eden mübârek hatt-ı hümâyûn-ı şevket-makrûnda münderic Ankara şalîsi kabîlinden olmayıp don yağı gibi vaktiyle bulunamaz lüzûmlu eşyâdan olup bu misillü muhtekirînin hufyeten iştirâ ve ol makūle bî-lüzûm kumaşçı ve yemenici tâifesine füruht olunması hem cânib-i mîrîye ve hem ibâdullâha mûcib-i hasâr ve mazâr olduğu vâreste-i beyân ve iş‘âr olmağla kâğıdçı esnâfının bâlâda mezkûr şurût-ı nizâmları üzere mutlakā Âsitâne’ye kâğıd vürûdunda kâğıdçıbaşı ve yiğitbaşı ve ihtiyârlar bi’l-ittifâk varıp tüccârından rızâlarıyla kat‘-ı pazar ile umûr-ı mühimmeye lüzûmu mikdârını kâğıdçıbaşı ve mâ‘adâsını esnâfı iştirâ edip içlerinden ve ecânibden ferd-i vâhidin hufyeten kâğıd iştirâsına cesâret etdirilmemesi münâfî-i hatt-ı münîf olmayıp belki şurût-ı mezkûreye ri‘âyet umûr-ı lâzıme ve mühimmeden olduğu arzuhâl ve derkenârlardan müstebân olmağla Âsitâne-i sa‘âdet’e taşradan ecnâs kâğıdın hîn-i vürûdunda gümrük emîni resm-i gümrüğünü ba‘de’l-ahz kâğıdçıbaşıya ihbâr, ol dahi kethudâ ve yiğitbaşı ve ihtiyâr ustaları ile bi’l-ittifâk varıp cânib-i mîrîye lüzûmu mertebesini ba‘de’l-iştirâ mâ‘adâsını ibâdullâh için kâğıdçı esnâfı değer bahâsıyla iştirâ ve esmânı ashâbına tamamen edâ olunup, muhtekir tâifesinin hufyeten iştirâ ve bî-lüzûm mahallere bey‘le itlâf ve izâ‘asından vikāye olunması hem cânib-i mîrîye ve hem ibâdullâha enfa‘ ve hayr-ı mahz olmağla kâğıdçı esnâfının bâlâda mezkûr şurût-ı nizâm-ı kadîmlerine ri‘âyet olunmak bâbında bâlâsı tuğrâ-yı garrâ-yı hazret-i cihân-dârî ile müveşşah bir kıt‘a fermân-ı celîlü’ş-şân inâyet ve ihsân buyurulmak iktizâ eylediği imtisâlen li’l-emri’l-âlî İstanbul Mahkemesi’nden huzûr-ı âlîlerine i‘lâm olundu. Fî 25 Şevvâl sene 1222.