İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 160 Hüküm no: 114 Orijinal metin no: [14b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Abdullah’ın, vefat eden eşi Ahmed Ağa’nın vasiyetinden dolayı Balmumcu Hacı Mehmed Ağa aleyhinde dava açmaktan menedilmesi 500 yaldız altını men‘i Ma‘rûz Mübârek rikâb-ı kamer-tâb-ı hüsrevânîye takdîm olunan arzuhâlde mezkûr İstanbul’da Tatlıkapı nâm mahâlde Esirci Kemal mahallesinde sâkin iken bin iki yüz on dört senesi hilâlinde vefât eden Bezzâzistânî el-Hâc Ahmed Ağa b. Abdullah’ın verâseti zevce-i metrûkesi Emine bt. Abdullah’dan gayrı vârisi olmayıp sülüs vasiyeti olmağla terekesinin rub‘unu verâsete ve mâ‘adâ terekesini dahi mûsâ-lehû bimâ-zâde ale’s-sülüs tarîki üzere kabz eden sâhibe-i arzuhâl mu‘arrefetü’z-zât mezbûre Emine bt. Abdullah Çarşamba günü Arz Odası’nda huzûr-ı hazret-i Sadrazamîde ma‘kūd meclis-i şer‘-i enverde derûn-ı arzuhâlde mezkûrü’l-ism Balmumcu el-Hâc Mehmed Ağa b. Ebâbekir mahzarında zevcim ve mûrisim müteveffâ-yı mezbûr hayatında fevtinden bir hafta mukaddem malından beş yüz aded yaldız altını benim için ifrâz ve hizmetinde olan işbu hâzır bi’l-meclis hâlâ zevcim olan Bolulu Hafız Hasan b. Mustafa için dahi yüz aded yaldız altını ifrâz edip ben vefât eder isem zevcem mezbûreye beş yüz adedini ve hizmetkârım mezbûra yüz adedini ver deyü cem‘an altı yüz aded yaldız altını bizim için işbu mezbûr Balmumcu el-Hâc Mehmed Ağa’ya verip bir hafta mürûrunda fevt olmağla mezbûr el-Hâc Mehmed Ağa yüz aded yaldız altınını ancak hâzır-ı mezbûr Hafız Hasan’a teslîm edip benim için kabz eylediği beş yüz aded yaldız altını yedinde kalmağla hâlâ taleb ederim deyü hâlâ zevci hâzır-ı mezbûr tasdîkiyle ba‘de’d-da‘vâ ve’l-inkâr müdde‘iye-i mezbûre şâhid olmak üzere ikāme eylediği üç nefer kimesneler şâhid-i zûr töhmetiyle müttehem oldukları ihbâr olunmağla şehâdetleri kabûl olunmayıp ba‘de’l-istimhâl ve’l-imhâl müddet-i mehl-i şer‘î bi’d-defa‘ât mürûrundan sonra ikāme eylediği bir nefer kimesne dahi edâ-yı şehâdet-i şer‘iye edememekle tard olunup mezbûre Emine şâhid-i âdil ikāmesine kādire ve tahlîfe dahi tâlibe olmamağın mûcebiyle müdde‘iye-i mezbûre da‘vâ-yı mezkûresiyle mezbûr Balmumcu el-Hâc Mehmed Ağa’ya bilâ-beyyine mu‘ârazadan men‘ olunduğu huzûr-ı âlîlerine i‘lâm olundu. Fî 27 Receb sene 1222.