İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 161 Hüküm no: 115 Orijinal metin no: [14b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Çalgıcı Rali’nin küçük oğulları Kostandi, Panayot ve Alentri’ye anaları Marya ve Harişi’nin vasi tayin olunmaları Nasb-ı Vasî Ma‘rûz Derûn-ı arzuhâlde mastûrü’l-ism olup bundan akdem hâlik olan Çalgıcı Rali v. Abram zimmînin verâseti zevce-i metrûkesi Marya bt. Dimitri Nasrâniye ile mersûme Marya’dan mütevellid sagīr oğlu Kostandi ve zevce-i mutallakası Harişi bt. Anaştaş Nasrâniyeden mütevellidler sagīr oğulları Panayot ve Alentri’ye ba‘de’l-inhisâr şahsı mu‘arrefe mersûme Marya Nasrâniye ile arzuhâl eden kezâlik şahsı mu‘arrefe mersûme Harişi Nasrâniyeden her biri meclis-i şer‘-i enverde takrîr-i kelâm edip sıgār-ı mersûmûnun babaları hâlik-i mersûmdan mevrûs Kumkapı’da bir bâb berber dükkânı derûnunda mevcûde gedik âlât-ı lâzıme-i ma‘lûmesinden gayrı ism-i mâl ıtlâk olunur mâlları olmayıp ancak gedik-i mezkûr ma‘rifetimizle âhara îcâr ile hâsıl olan kirâsından infâk ve iksâya eşedd-i ihtiyâc ile muhtâc olup lâkin tesviye-i umûrlarına kıbel-i şer‘den bir vasî nasb olunup umûrları idâre ve rü’yet olunmak lâzım ve mühim olmağla her birimiz sadrî sagīr evlâdımıza kıbel-i şer‘den vasî nasb ü ta‘yîn olunmak murâdımızdır dediklerinde gıbbe’t-tasdîki’ş-şer‘î mersûmetânın umûr-ı vesâyeti rü’yete iktidârları ihbâr olunmağla mersûme Marya Nasrâniye sagīr-i mersûm Kostandi zimmîye ve mersûme Harişi Nasrâniye dahi sagīrân-ı mersûmân Panayot ve Alentri’ye kıbel-i şer‘den vasî nasb ü ta‘yîn olunup vakt-i rüşd ve sedâdlarına değin mallarını hıfz ve umûrlarını rü’yete ve kemâ-yenbagī idâreye her biri ta‘ahhüd eyledikleri İstanbul Mahkemesi’nden huzûr-ı [âlîlerine i‘lâm olundu]. Fî 27 Şevvâl sene 1222.