İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 162 Hüküm no: 116 Orijinal metin no: [14b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yakut ve İstefan’ın vefat eden Turfanda ve Kigork’un verâsetinden dolayı İnci bt. Yoseb ve Kirkor v. Ohannes aleyhindeki davalarının reddedilmesi Kasımpaşa’da menzil mâddesi Ma‘rûz Derûn-ı arzuhâlde mastûrü’l-ism kasaba-i Kasımpaşa’da Yeniçeşme nâm mahâlde mütemekkinler iken müte‘âkiben hâlikler olan Turfanda ve Kigork veledey Agob nâm karındaşların hasran vârisleri li-ebeveyn kız karındaşları Yakut Nasrâniye tarafından vekâleti şahsını ârifân Sekyas v. Markos ve İstefan v. Elmiya şehâdetleriyle sâbit olan Avanes v. Armiya zimmî vekâleten ve li-ebeveyn ammi oğlu İstefan zimmî asâleten Çarşamba günü Dîvân-ı âlî’de ve ba‘dehû du‘âhânemizde ma‘kūd meclis-i şer‘-i enverde arzuhâl eden şahsı mu‘arrefe İnci bt. Yoseb Nasrâniye ile Kirkor v. Ohannes zimmî muvâcehelerinde mûrislerimiz hâlikân-ı mersûmândan mersûm Kigork zimmî kasaba-i mezbûrede Sirkeci Muslihiddin mahallesinde kâin ma‘lûmü’l-hudûd bir bâb mülk menzilden nısf hisse-i şâyi‘asını işbu bin iki yüz yirmi iki senesi Cumâdelûlânın yirmi ikinci günü târihiyle müverraha Mahmud Paşa nâibi müderrisîn-i kirâmdan Ali Bahar Efendi’nin imzâ ve hâtemini hâviye mersûm Kirkor zimmî yedinde olan bir kıt‘a hüccet-i şer‘iye nâtıka olduğu üzere bi-nefsihî mahkeme-i mezbûreye gelip menzil-i mezkûrun nısf-ı âharına mâlik olan mersûm Kirkor zimmîye iki yüz elli guruş semen-i makbûza bâtten bey‘ ve teslîm ve gabn ve tağrîrden kabûlü hâvî ibrâ-yı zimmet eyledikden sonra gelip dört gün mürûrunda hâlik olup ve hâlike-i mersûme Turfanda Nasrâniye dahi [15a] işbu mersûme İnci Nasrâniyenin menzilinde hâlike olmuş olmağla mersûmenin menzilinde mevcûde kalîl ü kesîr, celîl ü hakīr bi’l-cümle ism-i mâl ıtlâk olunur terekesini bizler tamamen bi’l-verâse ahz ü kabz edip mersûme İnci Nasrâniyenin yedinde olan bin iki yüz yirmi iki senesi Cemâziyelâhir’in beşinci günü târihiyle müverraha hâlâ Galata Bab nâibi Uryânîzâde müderrisîn-i kirâm-ı zevi’l-ihtirâmdan Mehmed Râşid Efendi’nin imzâ ve hâtemini hâviye bir kıt‘a hüccet-i şer‘iye nâtıka olduğu üzere hâlike-i mersûmenin bi’l-cümle ism-i mâl ıtlâk olunur ma‘lûm ve mechûl terekesine ve husûs-ı mîrâsa ve sâire müte‘allika âmme-i da‘vâdan mersûme İnci Nasrâniyenin zimmetini kabûlü hâvî ibrâ ve iskāt etmiş idik. Lâkin mersûm Kigork zimmî bey‘inden dört gün mürûrunda hâlik olmağla bey‘i maraz-ı fevtinde olmuş olup <> mu‘teber olmamağla nısf menzil-i mezkûrdan mersûm Kirkor zimmînin keff-i yedi ve hâlike-i mersûme Turfanda Nasrâniye dahi mersûme İnci Nasrâniyenin menzilinde hâlike olmuş olup hâlike-i mersûmenin mersûme İnci Nasrâniyede emvâl-i vâfiresi dahi olmak ihtimâli olmağla ber-vech-i muharrer ibrâmıza nâdim ve pişman olduğumuza binâen mersûme İnci Nasrâniye dahi tereke-i hâlike-i mersûmeden ketm ü ihfâ eylediği her ne ise zâhire ihrâç ve bize teslîm eylemesi bi’l-vesâye ve bi’l-vekâle murâdımızdır deyü takrîr-i meşrûhları üzere tasaddî eyledikleri da‘vâlarında mârrü’z-zikr iki kıt‘a mübâya‘a ve mübâree hüccetlerini ve nısf menzili bi-nefsihî varıp Mahmud Paşa Mahkemesi’nde bâtten bey‘ ve kabz-ı semen etmiş olduğunu ve ma‘lûm ve mechûl bi’l-cümle ism-i mâl ıtlâk olunur terekeden kabûlü hâvî ibrâ-yı zimmet eylediklerini mukır ve mu‘terifler iken kelâmlarına iltifât olunmayıp mersûmâna suâl dahi teveccüh etmemekle müdde‘iyân-ı mersûmân da‘vâ-yı mezkûreleriyle mersûmân Kirkor ve İnci Nasrâniyelere bî-vech mu‘ârazadan men‘ olundukları İstanbul Mahkemesi’nden huzûr-ı [âlîlerine i‘lâm olundu]. Fî 25 Şevvâl sene 1222.