İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 163 Hüküm no: 117 Orijinal metin no: [15a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sabuncu Ciridoğlu Seyyid Mehmed’in Girit tüccarından Han Ağası Hüseyin ve sairlerine olan borçlarını ödemesi 1849 guruş yirmi üç parayı istifâ Ma‘rûz Derûn-ı arzuhâlde mezkûrü’l-ism mukaddemâ Sabuncu Ciridoğlu es-Seyyid Mehmed b. Abdurrahman meclis-i şer‘-i enverde ashâb-ı arzuhâl Girid tüccârından olup kendi nefislerinden asıl Han Ağası Hüseyin Ağa ve Tiryâkioğlu Mustafa Ağa ve Suhtezâde İbrahim Ağa ve Çavuşoğlu Molla Mehmed ve Kuklakî Mustafa ve Tarakçıoğlu Derviş Ağa ve Mehmed Ali ve Yeğenzâde el-Hâc Mehmed Ağa ve Topçu Hasan Ağa ve Yeğenoğlu Molla Mehmed ve İmâmoğlu Derviş Ali ve Mücellid Mehmed Emin ve Dramalı Molla Mehmed nâm on üç nefer kimesne taraflarından husûs-ı âtîde vekîlleri olan Han Ağası dâmâdı Mehmed Ağa ve Kamaryalı el-Hâc Ali Ağa mahzarlarında zimmetlerinde asıl ve müvekkilûn-ı mezbûrûna sabun semeninden bâ-i‘lâm-ı şer‘î mahkûmün-bih sahîhan deynim olan bin sekiz yüz kırk dokuz guruş yirmi üç paranın bin iki yüz seksen dört guruş, hâzır bi’l-meclis Tatar Ömer Ağa zimmetinde dükkân gediği semeninden bâ-i‘lâm mahkûmün-bih alacağım olan bin iki yüz seksen dört guruşa her birimiz bi’t-terâzî ba‘de’l-kabz ve’l-mukāssa ve’l-kabûl ben alacağım olan bin iki yüz seksen dört guruşu hâzır-ı mezbûr Ömer Ağa’dan ol-vechile tamamen ahz ve istifâ edip asıl ve müvekkilûn-ı mezbûrûn dahi kezâlik zimmetimde alacakları olan mârrü’z-zikr bin sekiz yüz kırk dokuz guruşun bin iki yüz seksen dört guruşunu benden ol-vechile ahz ve istifâ etmeleriyle benim gerek hâzır-ı mezbûr Ömer Ağa zimmetinde ve gerek asıl-ı mezbûrân ve gerek müvekkilleri mezbûrûn zimmetlerinde aslâ ve kat‘a ve vechen mine’l-vücûh alacağım ve hakkım kalmamağla işbu târihe gelince husûs-ı mezkûra ve sâir cemî‘ hukūk-ı şer‘iyeye müte‘allika âmme-i da‘vâdan hâzır-ı mezbûr Ömer Ağa ve asılân-ı mezbûrân ve müvekkilûn-ı mezbûrûndan her birinin zimmetlerini ibrâ-yı âmm-ı sahîh-i şer‘î ile ibrâ ve iskāt eylediğimde onlar dahi alacaklarının ziyâdesi olan beş yüz altmış beş guruşdan bi’l-asâle ve bi’l-vekâle fâriğler olup meblağ-ı mezbûra müte‘allika da‘vâdan benim zimmetimi ibrâ ve iskāt ve her birimiz âharın ibrâsını kabûl edip eğer müvekkilûn-ı mezbûrûndan biri meblağ-ı bâkī-i mezbûrdan benden nesne mutâlebe ve şer‘an ahz ederler ise işbu asîlân-ı mezbûrân mikdâr-ı mehûzlarına kefil olduklarında kefâletlerini kabûl eyledim deyü bi’t-tav‘ ve’r-rızâ ikrâr ve tasdîkleri tescîl ve İstanbul Mahkemesi’nden huzûr-ı [âlîlerine i‘lâm olundu]. Fî 29 Şevvâl sene 1222. [Şühûdü’l-hâl:] Kazganoğlu Hacı Mehmed b. Ali, Mısır Çarşısı’nda Hafız Hacı Ahmed Ağa b. Abdullah, Pirinçci Habib Ağa b. Veliyüddin Efendi, Mısır Çarşısı’nda Attâr Vekîlharç Hacı Ali Ağa b. Abdullah, Mısır Çarşısılı Seyyid Hacı Ahmed Ağa b. Hacı Ali.