İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 164 Hüküm no: 118 Orijinal metin no: [15a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sefine reislerinden Osman’ın vefat eden Abdüllatif Paşa’da olan alacağından dolayı oğlu Abdülhalim aleyhindeki alacak davasında anlaşma sağlanması 750 guruşa sulh Ma‘rûz Bundan akdem vefât eden Abdüllatif Paşa b. el-Hâc Mehmed Said Efendi’nin verâseti zevce-i metrûkesi Âişe Hanım bt. Mehmed Efendi ile vâlidesi Zeliha Hanım’a ve sulbiye kızları Fâtımatü’z-zehra ve Rukiye hanımlara ve sulbî kebîr oğlu müderrisîn-i kirâmdan Abdülhalim Efendi’ye ba‘de’l-inhisâr sefîne reislerinden sâhib-i arzuhâl Osman b. Mehmed meclis-i şer‘-i münîrde tereke-i müteveffâ-yı mezbûra vaz‘-ı yedi mütehakkık olan mûmâ-ileyh Abdülhalim Efendi mahzarında bin iki yüz yirmi bir senesi Şevvâli’nin on beşinci günü râkib olduğum sefîne ile Kapan-ı dakīk’e geldiğimde müteveffâ-yı mûmâ-ileyh ol târihde hayatda Kapan-ı dakīk nâibi olmağla derûn-ı sefînede mevcûd ilişik? ta‘bîr olunur yedi yüz yetmiş beş keyl hınta ve iki yüz altmış keyl şa‘îrimi fuzûlî ahz ü kabz edip kıymetlerinden gayrı ez-teslîm zimmetinde bâkī kalan bin dört yüz guruşu kable’l-ahz ve’l-istifâ mûmâ-ileyh Abdüllatif vefât edip terekesi veresesine inkısâm olunmağla meblağ-ı mezkûru mûmâ-ileyh Abdülhalim Efendi’nin vâzı‘ü’l-yed olduğu tereke-i müteveffâ-yı mezbûrdan hâlâ taleb ederim deyü eylediğim da‘vâmı mûmâ-ileyh Abdülhalim Efendi inkâr etmekle beynimizde ba‘de vukū‘i’l-münâza‘a bâ-tavassut-ı muslihîn ben ber-vech-i muharrer tasaddî eylediğim da‘vâmdan mûmâ-ileyh Abdülhalim Efendi ile an-inkâr kat‘a li’n-nizâ‘ yedi yüz elli guruş bedel-i makbûza bi’t-terâzî ba‘de’s-sulh ve’l-kabûl ziyâdesine ve işbu târihe gelince sâir cemî‘ hukūk-ı şer‘iyeye müte‘allika âmme-i da‘vâdan mûmâ-ileyh Abdülhalim Efendi’nin ve verese-i sâirenin zimmetlerini kabûlü hâvî ibrâ-yı âmm-ı sahîh-i şer‘î ile ibrâ ve iskāt eyledim deyü ikrâr ve tasdîkleri tescîl ve İstanbul Mahkemesi’nden huzûr-ı [âlîlerine i‘lâm olundu]. Fî 3 Şa‘bân sene 1222.