İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 165 Hüküm no: 119 Orijinal metin no: [15a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kâtip Sinan mahallesi imamı Seyyid Hafız Osman Efendi’nin Lütfullah Efendi aleyhindeki vakıf menzil arsası davasının kabul olunmaması Vakıf menzil nizâ‘ı Ma‘rûz İstanbul’da Kâtib Sinan mahallesinin imâmı sâhib-i arzuhâl es-Seyyid Hafız Osman Efendi b. Mahmud meclis-i şer‘-i enverde Hâcegân-ı Dîvân-ı hümâyûndan zikri âtî nısf menzile bâ-temessük-i mütevellî mutasarrıf olmağla vaz‘-ı yedi mütehakkık olan Lütfullah Efendi b. Numan mahzarında İstanbul’da Kâtib Sinan mahallesinde kâin arsasının Kâtib Sinan mahallesi imâm ve müezzinine senevî yedi yüz yirmi akçe ve Mimâr Kemal mahallesi imâm ve müezzinine dahi senevî yedi yüz yirmi akçe ki cem‘an senevî bin dört yüz kırk akçe mukāta‘a-i kadîme ile üzerinde olan bi’l-cümle ebniyesi Rakım el-Hâc Mehmed Paşa’nın hayatında mülkü iken bin yüz yetmiş yedi târihinde bir kıt‘a vakfiye-i ma‘mûlün-bihâsı mûcebince vakıf ve tescîl edip zikr olunan imâm ve müezzinlerin senevî mukāta‘aları edâ olunup târih-i mezbûrdan beri menzil-i mezkûr Rakım Paşa Vakfı musakkafâtından olarak tasarruf olunagelip tedâvül-i eyâdî ile nısf menzil-i mezkûr Rakım Paşa Vakfı’ndan bâ-temessük-i mütevellî bi’l-icâreteyn mutasarrıfe olan mezkûr Lütfullah Efendi’nin zevcesi Berre Hanım fevt oldukda nısf menzil-i mezkûr sadrî sagīr evlâdı İbrahim Bey ve Hadice Hanım’a hasbe’l-âde intikāl etdikden sonra mezbûr Lütfullah Efendi babaları ve vasîleri olmağla nısf menzil-i mezkûru bi’l-izni’ş-şer‘î vesâyeten bâ-re’y-i mütevellî âhara ba‘de’l-ferâğ bin iki yüz yirmi bir senesi Rebî‘ülâhiri’nin yirmi üçüncü günü mutasarrıfı [15b] ferâğından bâ-re’y-i mütevellî kendi tefevvüz edip ol-vechile Rakım Paşa Vakfı temessüküyle taht-ı tasarrufunda olmağla vaz‘-ı yed edip, lâkin evlâdı sagīrân-ı mezbûrândan mezbûr İbrahim Bey bilâ-veled fevt olmağla nısf menzil-i mezkûr bânîsi ne kadar Rakım Paşa Vakfı temessüküyle mezbûr Lütfullah Efendi tasarrufunda ise dahi arsasının mücerred senevî yedi yüz yirmi akçe Kâtib Sinan imâm ve müezzinine mukāta‘a-i kadîmesi olup ve ben Kâtib Sinan imâmı olmamla arsadan sagīr-i müteveffâ-yı mezbûr İbrahim Bey’in hisse-i ma‘lûmesinden imâma iktizâ eden mikdârından keff-i yed etdirilmesi murâdımdır deyü arsa-i mezkûre arsa-i sırfe olmayıp mukāta‘a-i kadîme ile Rakım Paşa Vakfı’ndan olarak mezbûr Lütfullah Efendi’nin bâ-temessük-i mütevellî tasarrufunda olan ebniye-i mevcûde ile meşgūl olduğunu ve mukāta‘a-i kadîmesini bilâ-ta‘allül ahz ü kabz olageldiğini mukırr u mu‘terif iken takrîr-i meşrûhu üzere arsa-i mezkûre da‘vâsı müvecceh olmayıp senevî yedi yüz yirmi akçe mukāta‘a-i kadîmeden hissesini ahz edip Rakım Paşa Vakfı temessükü mûcebince mûmâ-ileyh Lütfullah Efendi’nin kemâ-kân zabt ve tasarrufu iktizâ eylediği İstanbul Mahkemesi’nden huzûr-ı [âlîlerine i‘lâm olundu]. Fî 23 Şa‘bân sene 1222. Beyaz Beyaz Beyaz [16a] Temme’l-kelâm Muradzâde es-Seyyid Murad el-kādî bi-dâri’s-saltanati’l-aliyyeti’s-seniyye nemekahu’l-fakīr ileyhi te‘âlâ gufira lehümâ [mühür:]