İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 166 Hüküm no: 121 Orijinal metin no: [16a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Varak v. Filibos’un Seyyid Mehmed aleyhindeki tarla davasının Erzurumda görülmesi Mahâllinde mürâfa‘aya havâle Ma‘rûz Arzuhâl eden Varak v. Filibos zimmî dîvân-ı âlîlerinde ma‘kūd meclis-i şer‘-i münîrde zikri âtî tarlaya vaz‘-ı yedi mütehakkık olan derûn-ı arzuhâlde mezkûrü’l-ism es-Seyyid Mehmed b. Ali nâm kimesne muvâcehesinde vilâyet-i Anadolu’da Erzurum Kazâsı hudûdu dâhilinde vâki‘ tahmînen bir keyl tohum isti‘âb eder bir kıt‘a tarla bundan akdem hâlik olan babam mersûm Filibos’dan bana âdiyen intikāl etmiş iken mezbûr es-Seyyid Mehmed bi-gayrı hakkın fuzûlî vaz‘-ı yed etmekle keff-i yedine ve mahâllinde bana teslîme mezbûr es-Seyyid Mehmed’e tenbîh olunmak matlûbumdur deyü da‘vâ, ol dahi cevâbında zikr olunan tarla müdde‘î-i mersûmun babası hâlik-i mersûm Filibos hayatında bâ-ma‘rifet-i sâhib-i arz bana ferâğ ve tefvîz, ben dahi tefevvüz etmiş idim deyücek husûs-ı merkūm mahâllinde sâhib-i arz hâzır olduğu hâlde terâfu‘-ı şer‘-i şerîfe muhtâc olan mevâddan olmağla tarafeyn mahâllinde mürâfa‘a olunmak bâbında emr-i âlî istid‘âsında idükleri İstanbul Mahkemesi’nden huzûr-ı âlîlerine i‘lâm olundu. Fî-gurreti Zilka‘de sene 1222.