İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 167 Hüküm no: 122 Orijinal metin no: [16b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mehmed’in Varak v. Filibos aleyhindeki alacak talebinden men olunması 207 guruşa mu‘ârazadan men‘ Ma‘rûz Es-Seyyid Mehmed b. Ali nâm kimesne meclis-i şer‘-i münîrde Varak v. Filibos zimmî muvâcehesinde vilâyet-i Anadolu’da Erzurum kazâsına tâbi‘ vâzı‘ü’l-yed olduğum bir kıt‘a tarla için mersûm Varak zimmî zikr olunan tarla bundan akdem hâlik olan mersûm Filibos’dan bana âdiyen intikāl etmiş iken bi-gayrı hakkın vaz‘-ı yed ediyorsun deyü târih-i i‘lâmdan üç sene mukaddem Karahisar-ı şarkī kasabasında huzûr-ı hâkimü’ş-şer‘de benden taleb ve da‘vâ eylediği esnâda ben mersûmun emrinsiz ba‘zı mahallere malımdan iki yüz yedi guruş harc ü sarf etmiş idim. El-hâletü hâzihî sâlifü’z-zikr tarlayı mücerred mersûm Varak zimmî ber-vech-i muharrer benden taleb ve da‘vâ eylediği ecilden masrûfum olan meblağ-ı merkūm iki yüz yedi guruşu malından bana vermek üzere mersûm Varak zimmîye cebr ve tenbîh olunmak matlûbumdur deyü takrîr-i meşrûhu üzere tasaddî eylediği da‘vâsına şer‘an iltifât olunmadığı İstanbul Mahkemesi’nden bi’l-iltimâs huzûr-ı âlîlerine i‘lâm olundu. Fî 2 Zilka‘de sene 1222.