İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 167 Hüküm no: 123 Orijinal metin no: [16a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kürkçübaşı mahallesi sakinlerinden Şerife Emine’nin mahalleden çıkarılması Mahalleden ihrâç Ma‘rûz Mahmiye-i İslâmbol’da Topkapı dâhilinde Kürkçübaşı mahallesi imâmı Hafız Hüseyin Efendi ve Müezzin Molla Mehmed ve ahâlisinden Mehmed Ağa b. Mehmed ve es-Seyyid Ahmed Efendi b. Ali ve Halil Efendi b. Süleyman ve İbrahim Odabaşı b. Mehmed nâm kimesneler meclis-i şer‘-i münîrde zâtı şer‘an mu‘arrefe olan Şerife Emine bt. es-Seyyid Mustafa nâm hatun muvâcehesinde mezbûre Şerife Emine Hatun mahalle-i mezbûrede vâki‘ bir bâb menzilde sâkine iken kendi hâlinde olmayıp menzil-i mezkûra mechûlü’l-ahvâl kimesneleri getirip irtikâb-ı menâhî eylediğinden mâ‘ada kendüden ateş havfumuz olduğuna binâen bundan akdem ahâli-i mahalle-i mezbûre iltimâsıyla merkūme Şerife Emine Hatun menzil-i mezkûrdan ihrâç olunmuş iken yine menzil-i mezbûrda sâkine olurum deyü bizi ta‘cîz ve tekdîrden hâlî olmamağla mezbûrenin vech-i muharrer üzere hilâf-ı şer‘-i mutahhar vaz‘ u hareketinden bir dürlü hoşnûd ve râzı değilleriz ve yed ve lisânından aslâ emn ü rahatımız yokdur deyü her biri teşekkî ve mahalle-i mezbûrede sâkine olmamak üzere mezbûre Şerife Emine Hatun’a tenbîh olunmak murâdımızdır dediklerinde mezbûre Şerife Emine Hatun dahi fîmâ-ba‘d mahalle-i mezbûrede sâkine olmamak üzere ta‘ahhüd eylediği İstanbul Mahkemesi’nden bi’l-iltimâs huzûr-ı [âlîlerine i‘lâm olundu]. Fî 7 Zilka‘de sene 1222.