İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 168 Hüküm no: 124 Orijinal metin no: [16a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Salih Beşe’nin İbrahim Ağa aleyhindeki fırın gediği davasında anlaşma sağlanması Ekmekçilere dâir Ma‘rûz Mahrûse-i Galata’ya muzâfe kasaba-i Kasımpaşa’da Büyük Piyale Paşa Câmi‘-i şerîfi kurbünde kâin ekmekçi fırınının gediğine mutasarrıf olan habbâzân esnâfından Salih Beşe b. Cafer nâm kimesne meclis-i şer‘-i münîrde esnâf-ı mezbûre kethudâsı İbrahim Ağa ve mazbûtü’l-esâmî nizâm ustaları hâzır oldukları hâlde kasaba-i mezbûrede Cumapazarı’nda vâki‘ bir bâb ekmekçi fırınının kezâlik gediğine mutasarrıf olan İbrahim Ağa b. Mehmed nâm kimesne muvâcehesinde zikr olunan fırının kadîmden üç aded tablası olup ve mârrü’z-zikr üç aded tablanın bir aded tablasını mezbûr İbrahim Ağa benim ber-vech-i muharrer mutasarrıf olduğum fırın-ı mezkûrumun tablası olmak üzere bundan akdem gāib ani’l-meclis [16b] Pandeli nâm zimmîden iştirâ eyledim deyü sâlifü’l-beyân bir aded tablayı tasarrufdan beni men‘ etmiş idi. El-hâletü hâzihî mezbûr İbrahim Ağa’nın mârrü’z-zikr tabla için kesik para ta‘bîr olunur medfû‘u olan dört yüz elli guruşu ben malımdan mezbûr İbrahim Ağa’ya ve zikr olunan tabladan keff-i yed ve bana teslîme ve mezbûr İbrahim Ağa dahi ber-vech-i muharrer bana teslîm edeceği tabla mukābili olup hâzırûn-ı mezbûrûn kethudâ ve nizâm ustaları mahâll-i âhardan bir tabla vermeğe her birimiz vech-i muharrer üzere ta‘ahhüd ve ol-vechile kat‘-ı nizâ‘ eyledik dedikde mezbûr İbrahim Ağa ile hâzırûn-ı mezbûrûndan her biri dahi mukırr-ı merkūmu kelimât-ı meşrûhasında tasdîk eyledikleri İstanbul Mahkemesi’nden bi’l-iltimâs huzûr-ı [âlîlerine i‘lâm olundu]. Fî 9 Zilka‘de sene 1222