İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 169 Hüküm no: 125 Orijinal metin no: [16b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Yovakim v. Lazari’nin Bakkal Kozma v. Anderya aleyhindeki bakkal dükkânı gediği satışına dair talebinin kabul olunmadığı 860 guruşun adem-i rü’yeti mu‘ârazadan men‘ Ma‘rûz Sâhib-i arzuhâl Bakkāl Yovakim v. Lazari zimmî meclis-i şer‘-i münîrde derûn-ı arzuhâlde mezkûrü’l-ism Bakkāl Kozma v. Anderya zimmî muvâcehesinde mersûm Kozma zimmî İstanbul’da Ebu’l-feth Sultan Mehmed Han Câmi‘-i şerîfi kurbünde Küçükkaraman nâm mahâlde kâin Kādıoğlu Dükkânı demekle ma‘rûf hâmiş-i arzuhâlde mesfûr derkenâr nâtık olduğu üzere Başmuhâsebe’de mukayyed ve mu‘teber bir bâb bakkāl dükkânı derûnunda mevcûde beyne’l-hıref gedik ta‘bîr olunur müstakılen yedinde emvâli olan bir kantar ve bir terâzî ma‘a derâhim ve sâir âlât-ı lâzıme-i ma‘lûmesini hüccet-i şer‘iye mantûkunca bakkālân pazarbaşısı ve nizâm ustaları ma‘rifetleriyle işbu sene-i mübâreke Şevvâli’l-mükerreminin ondördüncü günü bana altı yüz seksen guruş semen-i medfû‘ ve makbûza bâtten bey‘ ve temlik ve teslîm, ben dahi ber-vech-i muharrer iştirâ ve temellük ve kabz ve kabûl ve meblağ-ı mezkûrun tağrîr ve gabnine müte‘allika âmme-i de‘âvîden her birimiz âharın zimmetini kabûlü hâvî ibrâ ve iskāt etmiş idik. Lâkin ben ber-vech-i muharrer âlât-ı mezkûreyi füruht ü şirâma nâdim ve pişman olmamla mârrü’z-zikr âlât-ı lâzımeyi yedimden geri ahz ve semen deyü makbûzu olan meblağ-ı mezkûr altı yüz seksen guruşu bana redd ü teslîme mersûm Kozma zimmîye cebr ve tenbîh olunmak matlûbumdur deyü eylediği red da‘vâsına şer‘an iltifât olunmadığı İstanbul Mahkemesi’nden huzûr-ı âlîlerine i‘lâm olundu. Fî 10 Zilka‘de sene 1222.