İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 171 Hüküm no: 127 Orijinal metin no: [16b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esnaflıktan çıkarılması taleb olunan sıvacı esnafından Markar v. Agob’un kendi halinde işiyle meşgul olacağına dair taahhütte bulunması Sıvacı esnâfına dâir Ma‘rûz Âsitâne-i aliyye’de vâki‘ sıvacı esnâfının kethudâsı Karabet v. Serkiz ve Çavuş Serkiz ve müsinn ü ihtiyâr ustalarından Ohannes ve Kirkor ve Şahbaz ve Mihal ve Panayot ve Aleksi ve Yorgi ve Marat ve Arakil ve Bodos ve Abraham ve Kigork ve Praşkova ve Uğurlu ve Delot ve Mosis ve Tanaş ve Yani ve Artin ve Sava ve Dimitri ve sâirleri meclis-i şer‘-i hatîrde yine esnâf-ı merkūmeden Yeszimiz? oğlu Markar v. Agob zimmî muvâcehesinde mersûm Markar zimmî kendi hâlinde ırzıyla mukayyed ve kâr ü kisbiyle meşgūl olmayıp Lonca Odası’na gelip bize itâle-i lisân ve şütûm-ı galîza ile muvâcehemizde şetm ve ihtiyârlarımıza dahi itâ‘at etmeyip dâimâ nizâ‘-ı kadîmimizin mugāyiri nice harekât-ı nâ-bercâya ictisâr ve esnâfımız beyninde dürlü dürlü fesâdı mûcib hâlât-ı reddiyeye ibtidâr ve şirâze-i nizâmımızın ihtilâline bâdî olduğu âşikâr olmağla zimmî-yi mersûmun bu makūle ihtilâl-i nizâm-ı kadîmi mûcib harekât-ı nâ-marzıyesinden cümlemizin emn ve rahatımız meslûb olmağla kendüden bir vechile hoşnûd ve râzı değilleriz deyü mersûm Markar zimmînin sû-i hâlinden bahisle iştikâ ve vaz‘-ı kürek ile tedîbini iltimâs ve istid‘â eylediklerinde, ol dahi fîmâ-ba‘d mugāyir-i nizâm-ı kadîm hareket etmeyip ve ihtiyârlarına itâ‘at ve kendi kâr ü kisbiyle meşgūl ve ırzıyla mukayyed olmak üzere müte‘ahhid olup eğer hilâf-ı ahd harekete ictisâr eder ise esnâf-ı merkūmeden tard ve ihrâc olunup vaz‘-ı kürek ile tedîb olunmasına râzı olmağla bu sûretde esnâf-ı merkūme dahi ber-vech-i meşrûh şikâyetlerini tehîr ve bu vechile kat‘-ı münâza‘a eyledikleri İstanbul Mahkemesi’nden huzûr-ı [âlîlerine i‘lâm olundu]. Fî 12 Zilka‘de sene 1222.