İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 172 Hüküm no: 129 Orijinal metin no: [17a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sütlüce fırını tamire alındığından tamiri bitene kadar yakınında kapatılmış olan Halıcıoğlu İskelesi’ndeki fırının açılması Francala fırını sedd ü bendi Ma‘rûz Sâdır olan emr-i âlîlerine imtisâlen işbu derkenâr olunan fermân-ı âlîye ba‘de’n-nazar mefhûmu mahâll-i ma‘lûmede yedi aded francala fırınları ibkā ve mâ‘adâsı bi’l-külliye men‘ ve ma‘rifet-i şer‘le temhîr ve ol-vechile sedd ü bend olunmuş olup lâkin istid‘â olunan Sütlüce fırınının tecdîd ve ta‘mîri iktizâ eylediği ekmekçiler kethudâsı ve nizâm ustalarının ihbârlarıyla mârrü’z-zikr fırının harâbiyeti vâkı‘a mutâbık olduğuna binâen ahâlinin istirhâm ve nân-ı azîz husûsunda adem-i muzâyakaları için civârında ber-vech-i muharrer sedd ü bend ve taraf-ı şer‘den temhîr olunan Halıcıoğlu İskelesi’nde francalacı fırını ma‘rifet-i şer‘le küşâd otuz nihâyet kırk güne kadar nân-ı francala tabh olunmamak şartıyla ancak nân-ı azîz i‘mâl ve tabh ve ba‘dehû müddet-i merkūme tamamında ma‘rifet-i şer‘le temhîr birle sedd ü bend olunması iktizâ eder. Ma‘lûm-ı devletleri buyuruldukda muvâfık-ı re’y-i âlîleri olur ise bâlâ-yı i‘lâma emr-i âlîleri sudûru iktizâ eylediği İstanbul Mahkemesi’nden huzûr-ı âlîlerine i‘lâm olundu. Fî 9 Zilka‘de sene 1222.