İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 174 Hüküm no: 131 Orijinal metin no: [17a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Ali’nin Kostandi v. Yanaki ve Nikola v. Yanaki aleyhindeki kefalet ve alacak davasının meşru olmadığı 590 guruş men‘ Ma‘rûz Sâhib-i arzuhâl Ahmed b. Ali nâm kimesne meclis-i şer‘-i münîrde Kostandi v. Yanaki ve Nikola v. Yanaki nâm zimmîler muvâcehelerinde derûn-ı arzuhâlde ismi mastûr gāib ani’l-beled Tütüncü Panayot nâm zimmînin zimmetinde ismi ma‘lûmum olmayan bir vezir çukadârına cihet-i deyn-i şer‘îden mahkûmün-bih altı yüz doksan guruş deyni olmağla deyn-i mezkûru için gāib-i mersûm Panayot mahbûs iken mesfûrân Kostandi ve Nikola’dan her biri bana ve gāibûn ani’l-meclis Ebûbekir ve Hüseyin ile Yani ve Dimitri’ye biz mahbûs-ı mersûmun kefîli olduğumuz ecilden siz dahi mersûma kefîl olup hapisden tahlîs edin dediklerine binâen ben ve gāibûn-ı mersûmûndan her birimiz varıp mahbûs-ı mersûmun deyn-i mezkûruna müte‘âkiben kefîl ve zâmin olup ve deyn-i mezkûrun yüz guruşunu mahbûs-ı mersûm Panayot ve yüz guruşunu dahi ben mersûmân Kostandi ve Nikola’nın emirlerinsiz kendi malımdan ba‘de’l-edâ mersûm Panayot’u hapisden tahlîs ve bâkī kalan dört yüz doksan guruşu dâyini merkūma ve benim ber-vech-i muharrer edâ eylediğim meblağ-ı merkūm yüz guruşu bana kable’l-edâ ve’t-teslîm mersûm Panayot firâr ve gaybet etmiş idi. El-hâletü hâzihî minvâl-i meşrûh üzere edâ eylediğim meblağ-ı merkūm yüz guruşa mersûmân Kostandi ve Nikola kefîller olmayıp mücerred siz dahi kefîl olup mersûmu hapisden tahlîs edin dediklerine binâen ber-minvâl-i muharrer edâ eylediğim meblağ-ı mezbûr yüz guruş ile meblağ-ı bâkī-i merkūm dört yüz doksan guruş ki cem‘an beş yüz doksan guruşu kendi mallarından bana edâ ve teslîm etmek üzere mersûmân Kostandi ve Nikola’dan her birine cebr ve tenbîh olunmak matlûbumdur deyü takrîr-i meşrûhu üzere tasaddî eylediği da‘vâsına şer‘an iltifât olunmayıp mersûmân Kostandi ve Nikola’ya suâl dahi teveccüh etmediği İstanbul Mahkemesi’nden huzûr-ı âlîlerine i‘lâm olundu. Fî 17 Zilka‘de sene 1222.