İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 174 Hüküm no: 132 Orijinal metin no: [17a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Karlı’nın Üsküdar Köprübaşındaki bakkal dükkânını Tabutçular’daki dükkâna taşıması Bakkāl gediği İstanbul Mahkemesi’nde olmak, Ma‘rûz Hâmiş-i arzuhâlde mastûr derkenâr nâtık olduğu üzere Başmuhâsebe’de mukayyed mu‘teber gediklerden olup medîne-i Üsküdar’da Köprübaşı’nda kâin Molla Mehmed Vizonoz? dükkânı demekle ma‘lûm bir bâb bakkāl dükkânı gediğine şirâen mâlik olan arzuhâl eden Bakkāl Karlı v. Sarafim zimmî meclis-i şer‘-i hatîrde bi’l-cümle bakkālân Pazarbaşısı Süleyman Ağa ve bâ-hüccet-i şer‘iye medîne-i mezbûrede vekîli el-Hâc Mehmed Ağa ve Bölükbaşı es-Seyyid Ahmed Çelebi ile medîne-i mezbûre bakkālân nizâm ustalarından Yani v. Zahari ve Yuvan v. Anton ve Kot v. Luka ve Sava v. Anaştaş ve sâirleri hâzır oldukları hâlde yedlerinde olan emr-i şerîf-i âlî-şânda zikr ü beyân olunduğu üzere Âsitâne-i aliyye ve Bilâd-ı selâse ve tevâbi‘lerinde li-ecli’z-zarûre gedik nakli ile müceddeden bakkāl dükkânı ihdâs ve küşâdı ve bakkāl gediği bey‘ ü şirâsı iktizâ veyâhûd bakkāl tâifesinden biri gediğini zarûret-i deyn için dâyinine irhân murâd eyledikde pazarbaşı ve bölükbaşı ve nizâm ustaları ma‘rifetleriyle ancak İstanbul kādısı efendi huzûrunda cümlenin ihbârlarıyla i‘lâm ve hüccet olunmak ve mehâkim-i sâirenin birinde bakkāl gediği mübâya‘ası veyâhûd gedik nakline dâir i‘lâm ve hüccet etdirir ise amel ve i‘tibâr olunmayıp ve nakl iktizâ etdikde gediği kimesnenin mülkü olmayan âhar dükkâna nakl olunmak şurût-ı mer‘iyemizden olmağla benim mutasarrıfım olduğum gediğimin nakli muktezî olmağla dükkân-ı mezkûr mahâlline fîmâ-ba‘d bakkāl dükkânı ihdâs olunmamak şartıyla gedik-i mezkûru bu esnâda civârında mârrü’z-zikr Köprübaşı’nda Tabutçular nâm mahâlde ekmekçi fırını karşısında kâin Tavukçubaşı nâm kimesnenin mülkü olup istîcâr eylediğim bir bâb dükkâna nakl olunmasını iltimâs ve hâzırûn-ı mezbûrûn pazarbaşıları ve bölükbaşı ve nizâm ustaları dahi şurût-ı mer‘iyeye ri‘âyet birle yerine bakkāl dükkânı ihdâs olunmamak üzere mahâll-i merkūme nakl olunmasında mahzûru müstelzim nesne olmayıp ibâdullâha hayırlı ve enfa‘ olduğunu cümlesi bi’l-ittifâk ihbâr ve vech-i meşrûh üzere nakli husûsu için dükkân-ı mezkûrun mahâlli kaleminden ref‘ ve terkīn olunup civârında nakl olunan mahalle ismi tasrîhiyle Başmuhâsebe’ye kayd ve mersûm Bakkāl Karlı zimmî yedine sûret verilmek iktizâ eylediği İstanbul Mahkemesi’nden huzûr-ı âlîlerine i‘lâm olundu. Fî 13 Zilka‘de sene 1222.