İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 175 Hüküm no: 133 Orijinal metin no: [17b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Ağa’nın zeamet iltizamından dolayı Seyyid Ahmed Muhtar aleyhindeki alacak iddiasında anlaşma sağlanması 100 guruşa sulh Halil Ağa b. İbrahim nâm kimesne meclis-i şer‘-i münîrde es-Seyyid Ahmed Muhtâr b. es-Seyyid Mehmed nâm kimesne muvâcehesinde bundan akdem mezbûr es-Seyyid Ahmed Muhtâr bâ-berât-ı âlî-şân mutasarrıf olduğu Biga ve Gelibolu ve Hüdavendigar ve Kocaeli sancaklarında Ezine ve gayrı nâhiyelerde Mavzomat? ze‘âmetini bin iki yüz yirmi üç senesi Martı ibtidâsından Şubatı gāyetine gelince bedel-i ma‘lûm mukābelesinde işbu üç kıt‘a zabıt temessükü mantûklarınca bana ilzâm, ben dahi iltizâm ve kabûl ve ber-vech-i peşîn malımdan mezbûr es-Seyyid Ahmed Muhtâr’a bâ-tahvîlat ceste ceste bin yedi yüz elli guruş def‘ ü teslîm eylediğimde ol dahi yedimden tesellüm ve ahz ü kabz edip ze‘âmet-i mezkûru işbu târih-i i‘lâm senesi şehr-i Ramazan-ı şerîfinde âhara ferâğ ve kasr-ı yed etmekle bu vechile ze‘âmet-i mezkûrenin zabtı müyesser olmadığı ecilden medfû‘um olan meblağ-ı merkūm bin yedi yüz elli guruşu ben mezbûr es-Seyyid Ahmed Muhtâr’dan taleb ve da‘vâya tasaddî eylediğimde ol dahi hâl-i sugrumdan işbu i‘lâm târihine gelince on yedi sene ze‘âmet-i mezkûreyi iltizâm edip ziyâde ile âhara iltizâm eylediğine binâen medfû‘ olan meblağ-ı merkūm bin yedi yüz elli guruşu ecr-i mislinden mâ‘adâ ziyâde makbûzuna mahsûb ederim deyüp, ol-vechile beynimizde münâza‘ât-ı kesîre vukū‘undan bâ-tavassut-ı muslihîn ben mezbûr es-Seyyid Ahmed Muhtâr ile bin guruş bedel-i sulh olup mâ‘adâsı olan yedi yüz elli guruş mutâlebesine ve bedel-i sulhdan mâ‘adâ işbu târih-i i‘lâma gelince sâir müte‘allika âmme-i da‘vâ ve mutâlebâtdan her birimiz âharın zimmetini ibrâ-yı âm ile ibrâ ve iskāt ve herbirimiz ber-minvâl-i muharrer âharın ibrâsını ba‘de’l-kabûl hâlâ bedel-i sulh-ı mezkûr bin guruşu mezbûr es-Seyyid Ahmed Muhtâr’dan taleb ederim deyü da‘vâ, ol dahi ber-vech-i muharrer ikrâr ü i‘tirâf etmeğin mûcebince bedel-i sulh-ı mezkûr bin guruşun müdde‘î-i mezbûr Halil Ağa’ya edâsıyla merkūm es-Seyyid Ahmed Muhtâr ilzâm olunduğu İslâmbol Mahkemesi’nden huzûr-ı âlîlerine i‘lâm olundu. Fî 19 Zilka‘de sene 1222.