İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 176 Hüküm no: 134 Orijinal metin no: [17b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haraççı Kara Mehmed Mahallesi imamı İbrahim Efendi ve sair ahalinin mahalle sakinlerinden Selime bt. Mehmed ve kızı Fatıma’nın mahalleden çıkarılmalarını istedikleri Mahalleden ihrâç Ma‘rûz İstanbul’da Kapan-ı dakīk dâhilinde Harâccı Kara Mehmed mahallesi İmâmı İbrahim Efendi b. Mustafa ve ahâlisinden Dergâh-ı âlî kapıcıbaşılarından Hüseyin Ağa ve Elli Altı Çorbacısı Mehmed Emin Ağa ve Başyasakçı Osman ve tüccârdan el-Hâc Hüseyin Ağa ve Kavukçu Halil Ağa ve Suyolcu Mehmed Ağa ve sâbıkda Baştebdîl Süleyman Ağa ve Kömürcü Salih ve el-Hâc Mustafa ve Bezzazistânî Mustafa ve duhânî İsmail ve sâirleri meclis-i şer‘-i münîrde mahalle-i mezbûre sâkinlerinden Selime bt. Mehmed nâm hatun muvâcehesinde mezbûre Selime Hatun ve kızı gāibete ani’l-meclis Fatıma Hatun mahallemiz sükkânından olup lâkin kendi hâllerinde ve ırzlarıyla mukayyedler olmayıp, bed-zebân ve hadîdetü’l-lisân ve gece ihrâk var deyü sayha edip dâimâ müşâcereden hâlî olmadıklarından mâ‘adâ ve sâir ef‘âl-i kabîhayı mürtekibe olmalarıyla mezbûretânın harekât-ı nâ-marzıyelerinden emn ü rahatımız külliyen meslûb olup bi’d-defa‘ât kendülere nush [u] bend olundukda kat‘a müfîd olmayıp ısrâr üzere olmalarıyla mezbûre Selime ile kızı mezbûre Fatıma hatunlardan bir vechile hoşnûd ve râzı değilleriz deyü cümlesi bi’l-ittifâk iştikâ ve muvâcehesinde sû-i hâlini ihbâr ve mahalle-i mezbûreden hurûcunu bi-ecma‘ihim iltimâs ve istid‘â eyledikleri İstanbul Mahkemesi’nden huzûr-ı [âlîlerine i‘lâm olundu]. Fî 20 Ra sene 1222.