İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 178 Hüküm no: 136 Orijinal metin no: [18a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mestçi esnafından Memiş b. Osman’ın zenne terlikçiler esnafının işine karışmayıp sadece kendi sanatını icra etmeye taahhütte bulunması Derlikçi ta‘ahhüdü Ma‘rûz Âsitâne-i aliyye’de Mercan nâm mahâlde Beylik çarşıda kâin Çizmecibaşı İbrahim Ağa ve Zenne Derlikçi Kethudâsı Halil Ağa ve müsinn ü ihtiyâr ustaları Hafız İbrahim Efendi ve el-Hâc Hasan ve es-Seyyid Ahmed ve İsmail ve Mehmed Odabaşı ve Ali ve Hüseyin ve Çırçırlı Ahmed ve Mehmed ve es-Seyyid Kadri ve diğer Hüseyin Usta ve sâirleri meclis-i şer‘-i münîrde Dikicibaşı Süleyman Ağa hâzır olduğu hâlde mestçi ustalarından Memiş b. Osman muvâcehesinde merkūm Memiş mestçilik san‘atında mahâreti olup her sınıf mahâret kesbettiği san‘atını icrâ şurût-ı esnâfdan iken merkūm Memiş hırfetimizden olmayıp ve derlikçilik san‘atında üstâda hizmet ve tekmîl-i san‘at etmeyip hâm-dest kalb ve mağşûş zenne derliği i‘mâliyle mugāyir-i hilâf-ı şurût-ı nizâm zenne derliği i‘mâl edip hufyeten âhara bey‘i nizâm-ı kadîmimizin mugāyiri harekât-ı nâ-marzıyeye ictisârı esnâfımız beyninde dürlü dürlü fesâdı mûcib hâlât-ı reddiyeye ibtidâr ve şirâze-i nizâmımızın ihtilâline bâdî olduğundan mâ‘adâ işbu yedimizde olan emr-i âlîye mugāyir harekât-ı nâ-marzıyesi olmağla men‘ olunması murâdımızdır deyü muvâcehesinde teşekkî eylediklerinde merkūm Memiş dahi mestçilik san‘atında mahâret kesbedip zenne derlikçi esnâfına hizmet etmeyip hâm-dest olduğunu ikrâr ve fîmâ-ba‘d hilâf-ı şurût-ı esnâf derlikçilik san‘atına müdâhale etmeyip ancak kendi san‘atı olan mest i‘mâline kanâ‘at edip zenne derliği i‘mâl etmemek üzere ta‘ahhüd eylediğinde esnâf-ı merkūmûn dahi ta‘ahhüdünü kabûl ve bu vechile kat‘-ı münâza‘a eylediklerini hâvî fermân-ı âlîleri sudûrunu istirhâm eyledikleri İstanbul Mahkemesi’nden huzûr-ı âlîlerine i‘lâm olundu. Fî 24 Zilka‘de sene 1222.