İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 179 Hüküm no: 137 Orijinal metin no: [18a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sahtiyan ticaretiyle meşgul iken Perdahtçılık sanatını da icra eden Uşak tüccarından Hacı Memiş’in sadece sahtiyan ticareti yapacağına dair taahhütte bulunması Sahtiyâncı ta‘ahhüdü, Ma‘rûz Âsitâne-i aliyye’de Mercan Çarşısı’nda Perdahtçı Hanı’nda sâkinler Perdahtçı Esnâfının Kethudâsı es-Seyyid İbrahim Ağa ve müsinn ü ihtiyâr ustalarından Mehmed ve Ali ve Ömer ve Memiş ve İsmail ve Ahmed ve diğer İsmail ve diğer Ahmed ve âhar İsmail ve âhar Ahmed ve sâirleri meclis-i şer‘-i münîrde Dikicibaşı Süleyman Ağa ve Tâcirler Kethudâsı İsmail Ağa ve Dikiciler Kethudâsı es-Seyyid Ahmed Ağa hâzır oldukları hâlde Uşak tüccârından el-Hâc Memiş muvâcehesinde merkūm el-Hâc Memiş kadîmü’l-eyâmdan beri Uşak tüccârından olup taşra memleketlerden sahtiyân celb eder makūleden olmağla âhara sahtiyân bey‘iyle kendüyü idâre ve ta‘ayyüş eder iken, kāni‘ olmayıp bu esnâda perdahtçılık hırfetine şürû‘ ve hem kesb-i âhar ile meşgūl olması mugāyir-i nizâm-ı kadîm olduğundan mâ‘adâ esnâfımız beyninde cârî ve mu‘teber ve düstûrü’l-amel olan şurût-ı nizâmımızın ihtilâlini müstelzim ve bâ-husûs kesb-i âhar ile meşgūl olması iki esnâf beyninde nizâ‘ı mûcib bir keyfiyet olmağla merkūmun bu makūle ihtilâl-i nizâm-ı kadîmi mûcib harekât-ı nâ-marzıyesi men‘ ve san‘ateyn-i merkūmeteynin biriyle iktifâ eylemesi matlûbumuzdur deyü cümlesi bi’l-ittifâk iştikâ ve hâzırûn-ı merkūmûn dahi tasdîk eylediklerinde mezbûr el-Hâc Memiş dahi kaziyye minvâl-i meşrûh üzere olduğunu ikrâr ve fîmâ-ba‘d hilâf-ı nizâm-ı kadîm hareket etmeyip perdahtçılık san‘atını terk ile kadîm üzere Uşak’dan sahtiyân celbi ile kāni‘ ve meşgūl olmağa ta‘ahhüd eyledikde onlar [dahi] râzı olup bu vechile kat‘-ı münâza‘a eyledikleri İstanbul Mahkemesi’nden huzûr-ı âlîlerine i‘lâm olundu. Fî 21 Zilka‘de sene 1222.