İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 180 Hüküm no: 138 Orijinal metin no: [18a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Beşe’ye olan borcunu ödemesi hususunda Hacı İbrahim’e tenbihte bulunulması 92 guruş 25 para hüküm Ma‘rûz Sâhib-i arzuhâl Ali Beşe b. Hüseyin meclis-i şer‘-i münîrde el-Hâc İbrahim b. Mehmed muvâcehesinde mezbûr el-Hâc İbrahim işbu bin iki yüz on sekiz senesi Rebî‘ülâhirinin on beşinci günü mâlımdan ve yedimden bâ-temessük iktirâz ve kabz ve mesârifine sarfla istihlâk eylediği yedi yüz guruşu taleb ederim deyü ba‘de’d-da‘vâ ve’l-istintâk, ol dahi cevâbında târih-i merkūmda istikrâzını ikrâr, lâkin iki yüz sekiz guruş otuz dört parasını def‘aten ve üç yüz doksan sekiz guruş yirmi dört parasını def‘aten edâ etmemle cem‘an altı yüz yedi guruş on beş parasını edâ ve teslîm edip zimmetimde müdde‘î-i mezbûra doksan iki guruş yirmi beş [para] deyni olduğunu kat‘iyyen ikrâr etmekle müdde‘î-i merkūm Ali Beşe meblağ-ı merkūm iki yüz sekiz guruş otuz bir parayı merkūm el-Hâc İbrahim’in zimmetine mahsûben ahzını ikrâr ve üç yüz doksan sekiz guruş yirmi dört paradan benim zimmetimi ibrâ edip ben dahi ibrâ-yı mezkûru kabûl eyledim dedikde müdde‘î-i mezbûrdan ber-vech-i muharrer müdde‘âsına mutâbık beyyine taleb olundukda ityân-ı beyyineden izhâr-ı acz ile bi’t-taleb merkūm el-Hâc İbrahim ba‘de’t-tahlîfi’ş-şer‘î mûcebince meblağ-ı bâkī-i mezkûr doksan iki guruş yirmi beş parayı merkūm Ali Beşe’ye edâ ve teslîme mezbûr el-Hâc İbrahim’e tenbîh olunduğu İstanbul Mahkemesi’nden huzûr-ı [âlîlerine i‘lâm olundu]. Fî 26 Ra sene 1222.