İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 181 Hüküm no: 140 Orijinal metin no: [18a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çubukçu esnafı kethudası Halil Ağa’nın esnafta olan alacağını tecil ve taksitlendirmesi Çubukçu mâddesi Ma‘rûz İstanbul’da çubukçu esnâfının kethudâları Halil Ağa meclis-i şer‘-i münîrde esnâf-ı mezbûre yiğitbaşısı Mehmed Tâhir ve yazıcısı Osman ve müsinn ü ihtiyârlarından el-Hâc Hüseyin ve el-Hâc Hasan ve es-Seyyid Mehmed Ali ve Aksaraylı Mehmed Emin ile Yahûd ustalarından Yako ve Yanto ve Mişon ve Küçük Mişon ve Binhal? hâzır oldukları hâlde ashâb-ı arzuhâl esnâf-ı mezbûreden ve Kıbtiyân tâifesinden Şahbazoğlu Hasan ve Kuşçuoğlu Hüseyin ve Edirneli Salih ve Veli dâmâdı Hüseyin ve Çolak İsmail ve Büyük Arnavud Mustafa ve Küçük Arnavud Mustafa ve sâir mazbûtü’l-esâmî Kıbtîler muvâcehelerinde târih-i i‘lâmdan bir sene mukaddem işbu hâzır bi’l-meclis Bağdâdî el-Hâc Mehmed Ağa’dan iştirâ ve kabz eylediğim ma‘lûmü’l-aded kiraz çubuklarımı tâife-i mezbûre her biri âharın zimmetine lâzım gelen meblağa bi’l-emr ve’l-kabûl kefîl ve zâmin olmak üzere yedimden ale’l-iştirâki’s-seviyy iştirâ ve kabz eyledikleri aded ve fiyâtı beynimizde ma‘lûm kiraz çubukları semenlerinden müctemi‘ zimmetlerinde bana bâkī beş bin dokuz yüz kırk sekiz guruş deynleri olmağla meblağ-ı bâkī-i merkūm beş bin dokuz yüz kırk sekiz guruşu tâife-i mezbûrûn hâlen ve def‘aten bana edâya iktidârları olmayıp ber-vech-i âtî te’cil ve taksîte tâlib olmalarıyla ben dahi meblağ-ı bâkī-i merkūm beş bin dokuz yüz kırk sekiz guruşu işbu târih-i i‘lâmdan her beş ay tamamında bin dokuz yüz seksen ikişer guruş beşer akçesini verip ol-vechile târih-i mezkûrdan on beş ay tamamına dek mecmû‘unu bana edâ ve teslîm etmek üzere [18b] tâife-i mezbûreyi tecîl ve taksît eyledim dedikde, tâife-i mezbûre dahi deyn-i mezkûru ikrâr ve ecel-i merkūmu kabûl ve meblağ-ı bâkī-i merkūm beş bin dokuz yüz kırk sekiz guruşu ber-minvâl-i muharrer müddet-i mezkûre tamamında müeccelen ve muksitan kethudâ-yı merkūm Halil Ağa’ya edâ ve teslîme tâife-i mezbûreden her biri ba‘de’t-ta‘ahhüd tâife-i mezbûre dahi meclis-i şer‘de zikr olunan çubukların tağrîr ve gabnine ve noksân ahzlarına müte‘allika da‘vâdan kethudâ-yı merkūm Halil Ağa’nın ve gerek merkūmân Osman ve Mehmed Tâhir ile hâzır-ı mezbûr Bağdâdî el-Hâc Mehmed Ağa’dan her birinin zimmetini ibrâ-yı âm ile her biri ibrâ ve iskāt eylediklerinde onlar dahi ibrâ-yı mezkûru kabûl edip kat‘-ı nizâ‘ eyledikleri İstanbul Mahkemesi’nden huzûr-ı âlîlerine i‘lâm olundu. Fî 20 min-Zilka‘de sene 1222.