İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 182 Hüküm no: 141 Orijinal metin no: [18b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. 1222 senesi Kurban Bayramı’nın minarelerde kandiller yakılarak ilan olunması Îd-i edhâ sübûtu, Bâ-sah. İstanbul kādısı fazîletlü efendi, İşbu i‘lâmınız tarafımızdan bâ-takrîr Rikâb-ı kamer-tâb-ı cihân-dârîye arz ve takdîm olundukda ma‘lûm-ı hümâyûnum olmuşdur. “Tenbîh olunsun izn-i hümâyûnum olmuşdur” deyü bâlâda takrîrimiz hatt-ı şerîf-i şâhâne şeref-rîz-i sudûr olmağla mûcebince minârât ve cevâmi‘ ve mesâcide îkād-ı kanâdîl olunmak için kayyumbaşılara tenbîh eylesin deyü Fî 2 Z sene 1222 Dergâh-ı felek-bünyân ve bârgâh-ı âsumân-unvânlarına ma‘rûz dâ‘î-i şâkirü’l-ihsânlarıdır ki Târih-i eşref-i evlâd-ı hazret-i Halil ve İsmail -aleyhim ve alâ-âlihim etemme’t-teslîm mine’l-kerîmi’l-celîl- efendimiz hazretlerinin işbu sâl-i pür-şeref bin iki yüz yirmi iki senesi gurre-i şehr-i Zilhiccetü’ş-şerîfesi’nin sübûtuyla îd-i edhânın sübûtu îd-i fıtr misillü olduğuna binâen şehâdât-ı hasbiyede tasvîr-i da‘vâ ve şart olmadığı ecilden Âsitâne-i aliyye’de ve Davudpaşa mahallesi sükkânından Hamdullah Efendi b. Ahmed ve İbrahim Ağa b. Mehmed Necib nâm kimesneler li-ecli’ş-şehâdeti’l-hasbiye meclis-i şer‘-i hatîr-i lâzımü’t-tevkīrde hâzırân olup isre’l-istişhâd fi’l-hakīka Zilka‘deti’ş-şerîfenin selhi Cuma günü ba‘de’l-gurûb havada gaym ve özr-i illet olduğu hâlde biz hilâl-i Zilhicce’yi re’yü’l-ayn müşâhede eyledik. Bizler bu husûsa şâhidleriz şehâdet dahi ederiz deyü her birleri edâ-yı şehâdet-i hasbiye eylediklerinde ba‘de’t-ta‘dîl ve’t-tezkiye şehâdetleri makbûle olup gurre-i Zilhicce yevmü’s-sebt’den idüğü müte‘ayyen olmağla dokuzuncu yevmü’l-ahad yevm-i arefe-i mağfiret-hüdâyâ ve ferdâsı yevm-i isneyn îd-i edhâ-yı meyâmin-matâyâ olup leyle-i mübâreke-i îd-i şerîf-i lâzımü’l-ihtirâm ibâd-ı Müslimîne i‘lân ve ifhâm için cânib-i seniyyü’l-menâkıb ve Devlet-i aliyyeden kāmet-i dilârâ-yı minârâta dîbâ-yı zerrîn-târ-ı kanâdîl ile ilbâs-ı hil‘at ve bu vechile cümle ehl-i îmân vâsıl-ı Ka‘be-i safâ ve meserret kılınmak deydene-i hasene-i saltanat-ı seniyyeden olmağla ol leyle-i mübârekede vetîre-i müstahsene-i mezkûrenin alâ-mâ cera’l-âde icrâsına izin ve ruhsat-ı sâmîleri erzânî buyurulur ise ol-bâbda fermân-ı cihân-mutâ‘ları sudûru iktizâ eylediği İstanbul Mahkemesi’nden pîşgâh-ı melâik-mutâflarına i‘lâm olundu. Bâkī emr ü fermân li-hazreti veliyyü’n-ni‘met ve’l-ihsân. Fî-gurreti Zilhicceti’ş-şerîfe sene isneyn ve ışrîn ve mi’eteyn ve elf.