İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 183 Hüküm no: 143 Orijinal metin no: [18b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mehmed Ağa’ın sahibi bulunduğu hamamın kiracısı Fatıma aleyhindeki davasında anlaşma sağlanması Hamam nizâ‘ı Ma‘rûz Âsitâne-i aliyye’de Cibâli Yenikapısı sâkinlerinden es-Seyyid Mehmed Ağa b. İbrahim meclis-i şer‘de Fatıma Hatun bt. Ahmed muvâcehesinde Yenikapı dâhilinde kâin Atik Vâlide Sultan Vakfı’ndan beher şehr otuz beşer akçe icâre ile mutasarrıf olduğum hamamda işbu müstecirem Fatıma Hatun hamam-ı mezkûru harâb ve bu vesîle ile yüz otuz beş guruş ta‘mîr ve termîmine sarf etmem ile merkūmeyi ihrâc matlûbumdur dedikde lede’s-suâl cevâbında hamam-ı merkūmu işbu bin iki yüz yirmi bir senesi Rebî‘ülâhir gurresinden yirmi üç senesi Rebî‘ülevvel gāyetine değin iki sene hamam-ı mezkûru bana îcâr ve ben dahi istîcâr ve kabûl ve yedime bir kıt‘a îcâr temessükü vermiş idi deyü da‘vâsına muvâfık bir kıt‘a temessük ibrâz ve bu vechile münâza‘aları cereyân, ba‘de vukū‘i’l-münâza‘a bâ-vesâtet-i muslihîn meblağ-ı merkūm yüz otuz beş guruşdan elli guruş bedel-i makbûza sulh ve mâ‘adâyı ba‘de’l-ibrâ ve’l-kabûl târih-i i‘lâmdan yirmi üç senesi Rebî‘ülevveli gurresine değin merkūme Fatıma Hatun zabt etmek üzere kat‘-ı nizâ‘ eyledikleri İstanbul Mahkemesi’nden huzûr-ı [âlîlerine i‘lâm olundu]. Fî 25 Za sene 1222.