İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 189 Hüküm no: 152 Orijinal metin no: [19b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf Ağa’nın, Terzi Mardıros ve kardeşi Kigork aleyhindeki oda satışı davasını ispat edememesi Sultan Odalarında Oda mâddesi mazbatadan ihrâc Ma‘rûz Sâhib-i arzuhâl Âsitâne-i aliyye’de Sultan Bâyezid’de sâkine Yusuf Ağa b. Ali meclis-i şer‘-i münîrde Derzi Mardıros ve karındaşı Kigork veledey Markos zimmîler muvâcehelerinde Âsitâne-i aliyye’de Mahmud Paşa Câmi‘-i şerîfi kurbünde Rüstempaşa Vakfı musakkafâtından Sultan Odaları demekle arîf Han’ın tahtânîsinde sol tarafda vâki‘ dokuzuncu bir bâb oda derûnunda gedik ta‘bîr olunur âlât-ı lâzıme-i ma‘lûmeye mâlik olan el-Hâc Selim b. Abdullah târih-i i‘lâmdan iki sene mukaddem yedimden ve malımdan ahz ü kabz eylediği iki bin guruş mukābelesinde târih-i mezbûrda bi-tarîki’l-istiğlâl bana bey‘ ü teslîm, ben dahi tesellüm ve kabz ü kabûl edip bi-tarîki’l-istiğlâl yedimde olmağla benim izin ve icâzetim yoğiken işbu mersûmâna bey‘ etmekle yedimde olan fetvâ-yı şerîfe mûcebince yedime teslîm olunmak matlûbumdur deyü da‘vâ ve mersûmân minvâl-i meşrûh üzere merkūm el-Hâc Selim’in gedik-i mezkûru meblağ-ı mezbûr iki bin guruş mukābelesinde müdde‘î-i merkūm Yusuf Ağa’ya bi-tarîki’l-istiğlâl bey‘, ol-vechile yedinde olduğunu bi’l-külliye inkârından sonra müdde‘î-i merkūmun müdde‘âsına mutâbık beyyine taleb olundukda Mahmudpaşa sâkinlerinden Mehmed Ağa b. Hüseyin nâm bir nefer şâhid ikāme eyleyip nisâb-ı şehâdet olmadığından şâhid-i âhar ikāmetine havâle olunmağın da‘vâlarına henüz faysal verilmeyip bu vechile cerîdede mazbût olmağın imtisâlen li’l-emri’l-âlî sûret-i zabtı İstanbul Mahkemesi’nden huzûr-ı [âlîlerine i‘lâm olundu]. Fî 6 Z sene 1222.