İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 190 Hüküm no: 153 Orijinal metin no: [19b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pretamos v. Vasil ve Ananya v. Kirkor’a yağcı küfeciliği yapmalarına izin verilmesi Yağcı küfecilerinin fermân istid‘âları Ma‘rûz “Derkenâra nazar birle bi’r-rızâ kefîle rabta şâyân ise i‘lâm eyleyesiz” deyü bu dâ‘îlerine hitâben sâdır olan fermân-ı âlîlerine imtisâlen fi’l-asl Âsitâne-i aliyye’de revgan-ı sâde ve revgan-ı zeyt küfecilerinden sâhibey-i arzuhâl Pretamos v. Vasil ve Ananya v. Kirkor zimmîler meclis-i şer‘-i münîrde Balkapanı nâzırı Vefâlızâde es-Seyyid el-Hâc Hasan Ağa ve Salih Ağa ve Turhan Ahmed Ağa ve Silistre tüccârından es-Seyyid Ahmed Ağa ve es-Seyyid İsmail Ağa ve revgan-ı zeyt tüccârından el-Hâc Hüseyin Ağa ve Hasan Ağa ve sâirleri ve Galata kapanı nâzırı es-Seyyid el-Hâc Ali Ağa ve tüccârlarından Ketânî Hüseyin Ağa ve İbrahim Alemdar ve Mustafa Ağa ve sâirleri ile Bakkālân Pazarbaşısı Süleyman Ağa ve Bölükbaşı es-Seyyid Ahmed ve bi’l-cümle nizâm ustaları hâzır oldukları hâlde mersûmân takrîr-i kelâm edip bizler ez-kadîm Âsitâne-i aliyye revgan-ı sâde ve revgan-ı zeyt küfecilerinden olup bi-hasebi’l-iktizâ vatan-ı aslîmiz olan vilâyet-i Anadolu’da İncesu kazâsına rehgîr olduğumuz esnâda işbu hâzırûn-ı merkūmûn huzûr-ı şer‘a gelip otuz iki nefer küfeciler muvâcehelerinde zimmîyyûn-ı mersûmûn bizlerden aldıkları revgan-ı zeyt ve revgan-ı sâdeyi esvâk ve pazar ve mahallât aralarında bey‘ ile akçelerini bizlere edâ etmediklerinden başka ba‘zıları müflis ve ba‘zı âharları firâr ile tüccâra zarar-ı küllî etmeleriyle fîmâ-ba‘d mesfûrûn ber-mûceb-i emr-i âlî memnû‘ olan sefâine ve sâir mahallere bey‘ etmeyeceklerinden mâ‘adâ mâl-ı tüccârı itlâf ve izâ‘at etmeyip vakt ü zamanıyla ashâbına akçelerini ve bilâ-kefîl bir kimesne küfecilik tarîkiyle mahâll-i âhara bir dirhem bey‘ veyâhûd mâl-ı tüccârı telef etmemeğe küfelâya rabt iltimâslarına binâen bey‘ edecekleri revgan-ı sâde ve revgan-ı zeyti memnû‘ olan sefâine deniz aşırı mahâlde bir dirhem yağ bey‘ etmeyip vechen mine’l-vücûh mâl-ı tüccârı izâ‘at ve itlâf etmemeleri için bâ-emr-i âlî nizâma rabt olunmakla her birimizin emr-i ma‘âşı küfeciliğe münhasıra olduğuna her birlerimizin kefîllerimizi ahz ve kemâ-fi’s-sâbık sâir küfeciler misillü küfeciliğe idhâl olunmak matlûbumuzdur dediklerinde işbu derkenâra nazar ve mefhûmunda küfecilik husûsu aded tahtına münhasıra olmayıp ber-mûceb-i emr-i âlî mezûn oldukları vechile ibâdullâha revgan bey‘i hayır ve menfa‘ati olduğu ve memnû‘ olan sefâine ve deniz aşırı mahallere bey‘ etmemek ve tüccârın malı itlâf ve izâ‘at olunmamak vecihleri üzere küfelâya rabt ve bir aded tahtına hasr olunmamağla hâzırûn-ı merkūmûn dahi mesfûrânın kadîmden küfeci olduklarını ikrâr, lâkin emr-i âlînin mantûku üzere tüccârın emvâli itlâf ve izâ‘at olmayıp herbirleri müflis, ya firâr ederi olur ise mâl-ı tüccârı edâya zâmin olmak üzere küfelâya rabt olunur ise kemâ-fi’l-evvel küfeciliğe bi’r-rızâ idhâl olunsun deyü her birleri takrîr ve râzı olmalarıyla işbu hâzırûn bi’l-meclis bakkālân nizâm ustaları Çakıroğlu Yorgi v. Oryanos ve Fenerli Zero v. Togodoş ve Hasanpaşalı Nikola v. Angeli ve Müftü Hamamlı Yorgaki v. Yani ve Çarşambapazarlı Yağmur v. Lefter ve Zindankapılı Lefter v. Kiryako ve Kumoğlu Dimitri v. Zaharya’dan her birleri bâ-emr-i âlî nizâmları üzere işbu mersûmân Ananya ve Pretamos’un her birlerine tüccârın emvâl ve eşyâlarından zâyi‘ ve telef ve hilâf-ı emr-i âlî deniz aşırı ve âhar mahallere bey‘ etmeyip eğer müflis yâ firâr ederi olur ise itlâf ve izâ‘at eyledikleri eşyânın semenlerini edâya kefîl ve zâmin oluruz deyü ikrârlarını tüccâr-ı mezbûrûn dahi rızâlarıyla ba‘de’l-kabûli’t-tescîl ve bi’t-terâzî mesfûrânın küfeciliklerine ruhsatı hâvî emr-i âlîleri sudûrunu cümlesi istid‘â ve istirhâm eyledikleri İstanbul mahkemesinden huzûr-ı [âlîlerine i‘lâm olundu]. Fî 4 Zilhicce sene 1223.